COV ZAJ NYEEM RAU HNUB CHIV 06/12/2009
( Hnub chiv 2 Tos Huab Tais - Xyoo C )
  • Zaj nyeem 1 : Npas Lws (5,1-9)
1 Yes Lus Xas Les, hle koj daim tsoos chim siab thiab txom nyem cia, hnav Tswv Ntuj daim tsoos hwj chim mus ib txhis.
2 Muab Tswv Ntuj lub tsho loj ncaj ncees los qwv koj, muab lub mom hwj chim nyob mus li los tso saum koj taub hau.
3 Tswv Ntuj yuav muab koj lub meej mom ua nto hauv qab ntuj,
4 Tswv Ntuj yuav tis cov npe no rau koj mus tas ib sim : « Thaj yeeb kev ncaj ncees » thiab « Lub hwj chim hwm Tswv Ntuj »
5 Sawv tsees, Yes Lus Xas Les ! Koj mus sawv pem lub chaw siab tig ntsia sab toob fab : pom Tswv Ntuj Ntshiab lo lus txoos koj cov me nyuam puag qab ntug ntsa txog qab ntug tsaus. Lawv zoo siab heev, vim Tswv Ntuj nco ntsoov lawv.
6 Koj pom lawv sawv kev mus taw yeeb ncuab nrog nraim, Tswv Ntuj coj lawv los cuag koj thauj lawv muaj ntsej muag tam zoj zaum tsaws vaj ntxwv lub theej kiab.
7 Vim Tswv Ntuj txiav siab muab cov ncov tsua thiab toj roob ib txwm nyob txawm ua kom qis tuaj thiab yuav txhub tej vos hav rau : daim av yuav tus yees tuaj, His Xais Lais yuav mus los tau luag hauv Tswv Ntuj lub hwj chim.
8 Tswv Ntuj lus : hav zoov thiab ntoo tsw qab yuav ntxoov nyos roos His Xais Lais.
9 Tswv Ntuj yuav hwj xwm His Xais Lais muaj kev zoo siab hlo hauv nws lub hwj chim kaj nrig thiab yuav pub muaj nws lub siab hlub lub siab ncaj ncees nrog ncig.

  • Zaj nyeem 2 : Fis Lis Pos (1, 4-6.8-11)
4 Kuv zoo siab thov Ntuj rau nej tsis tseg,
5 vim kuv nco tias, txij thawj hnub
los txog tav no, nej tau nrog kuv tshaj lub Moo Zoo.
6 Kuv paub tseeb tias, tus tau
pib ua hauj lwm nyob hauv nej, nws tau ua ib txoj hauj lwm zoo kawg, thiab nws yuav ua kom tiav, mus txog Yes Xus Pleev lub Hnub Nyoog.
8 Tswv Ntuj ua tim khawv tau tias, kuv hlub nej mos nyoos nyob hauv Yes Xus Pleev lub siab.
9 Kuv thov Ntuj li no :
thov kom nej txoj kev nyiam Ntuj hlob zuj zus, thiab nej paub zaj txuj ci tseeb, kom nej txawj xav,
10 mas nej thiaj li
yuav pom tau qhov zoo tshaj, thiab yuav ua neeg siab dawb siab huv, kom tsis txhob muaj ib qho xyeej nyob hauv nej, mus txog Leej Pleev lub Hnub Nyoog.
11 Nej yog ib co txiv ntoo siav hauv txoj kev ncaj, uas Leej Pleev muab rau peb ris kom Tswv Ntuj nto koob meej, thiab kom sawv daws cav lus zoo txog Tswv Ntuj.

  • Lus Kas Ntawv Moo Zoo (3, 1-6)
1 Xyoo kaum tsib, Tis Npes tseem ua vaj ntxwv, Poos Xis Yus Pis Las Tos ua tswj kav Yus Das, Hes Los ua vaj txheeb kav Nkas Lis Lais, nws tus tij laug Fis Lis Pos ua vaj txheeb kav Is Tus Lias thiab Thas Kos Nis Tis. Lis Xas Nias ua vaj txheeb kav As Npis Les Nas.
2 As Nas thiab Kais Fas nkawd ua tuam Leej Choj. Tswv Ntuj Lo Lus nrov tuaj txog Zam yog Ntxas Kas Lias tus tub nyob hav suab puam.
3 Zam tuaj mus ncig thoob cheeb tsam ntawm Yos Las Das, nws tshaj kab ke ntxuav plig hloov siab tshiab los txais kev zam txhaum
4 Raws li cov lus sau tseg hauv yaj saub His Xais phau ntawv : Ib lub suab nrov hla hav suab puam : Nej npaj Huab Tais txoj kev, nej ua kom nws txoj kev tiaj tus.
5 Yuav txhub txhua lub kwj ha, txhua lub tsua txhua lub toj roob yuav ua kom qis; qhov com kawb yuav ua kom ncaj, tej kev qawj yuav ua kom tiaj tus.
6 Tas sawv daws yuav pom Tswv Ntuj kev cawm neeg.



0 commentaires: