COV ZAJ NYEEM RAU HNUB CHIV 13/12/2009
( Hnub chiv 3 Tos Huab Tais - Xyoo C )

  • Zaj nyeem 1 : Xos Fos Nias 3,14-18
14 Qw muaj ceem kev zoo siab, Xis Yoos me ntxhais ! Qw suab ncha ntws, His Xais Lais ! Lom zem rau koj, zoo koj siab nyob kaj lug, Yes Lus Xas Les me ntxhais !
15 Huab Tais muab koj cov neeg lam liam koj ntiab khiav, ua thaub qab koj tus yeeb ncuab. Huab Tais, His Xais Lais tus vaj ntxwv nyob hauv koj. Tsis txog koj yuav muaj kev txhawj xeeb.
16 Hnub ntawd, luag yuav hais rau Yes Lus Xas Les : “Tsis txhob ntshai, Xis Yoos ! Txhob cia koj tej tes tuag zawv !
17 Koj tus Huab Tais Tswv Ntuj nyob hauv koj, yog nws, tus ntaus thawj muab kev cawm neeg tuaj. Hauv koj yuav yog nws kev zoo siab thiab kaj siab lug, nws yuav ua dua koj tshiab khiv muaj nws txoj kev hlub.
18 Nws yuav dhia yom cev rau koj qw suab lom zem ntws cuag tej hnub tees.”

  • Zaj nyeem 2 : Phis Lis Pos 4, 4-7
4 Nej yuav zoo siab mus li nyob hauv Huab Tais. Kuv rov hais dua tias nej zoo siab tiag mog !
5 nej yuav ua kom sawv daws paub tias, nej txawj yuav luag siab, vim Huab Tais los txog ze lawm.
6 Nej tsis txhob
txhawj dab tsi. Thaum nej thov Ntuj, thiab nej teev Ntuj, mas nej kuj yuav ua
Ntuj tsaug. Thiab tej yam nej xav tau, nej yuav hais rau Tswv Ntuj paub.
7 Tswv Ntuj txoj kev thaj yeeb zoo tshaj
qhov yus xav tau : nws txoj kev thaj yeeb yuav txuag nej lub siab thiab nej lub tswv yim kom nyob hauv Yes Xus Pleev.

  • Lus kas Ntawv Moo Zoo 3,10-18
10 Cov npoj neeg tuaj kom Zam ntxuav lawv plig nug tias : "Peb yuav ua dab tsi ?"
11 Zam teb rau lawv tias : “Tus muaj ob lub tsho, kom nws faib rau tus tsis muaj. Tus muaj mov noj, kom ua tib yam nkaus.”
12 Cov neeg sau se kuj tuaj ntxuav plig thiab, lawv nug tias : "Xib Hwb, peb yuav ua dab tsi ?"
13 Nws teb lawv tias : "Tsis txhob sau tshaj txoj cai muaj tseg rau nej tuav."
14 Los txog cov tub rog, lawv nug nws tias : "Peb ne, peb yuav ua dab tsi ?" Nws teb lawv tias : "txhob muaj leej twg yuam cai, txhob ua tub qaug leej twg ; nej yuav txaus siab rau nej lub nqe zog."
15 Tsoom pej xeem nyob tos, tas sawv daws xav tau zom zaws hauv nyias nruab siab ua li Zam yog los tsis yog Leej Pleev.
16 Ces Zam hais rau sawv daws tias : "Kuv li, kuv muab dej los ntxuav nej, tiam sis tus muaj zog tshaj kuv, nws yuav tuaj. Kuv twb tsis tsim nyog daws nws txoj hlua khau. Nws li, nws yuav ntxuav nej hauv Leej Ntuj Plig Ntshiab thiab hauv hluav taws.
17 Nws tuav nws rab ntxuam ntawm tes yuav ntxuaj kom pov khawv nws lub tshav nplej thiab nws yuav sau cov nplej rau hauv nws txhab. Dua li, lub npluag yuav kub nyiab suaj kaum hauv hluav taws tsis txawj kug.
18 Nws tshaj lub Moo Zoo rau tsoom pej xeem hais ntau zaj qhuab qhia thiab lwm yam ntxiv.



0 commentaires: