COV ZAJ NYEEM RAU HNUB CHIV 20/12/2009
( Hnub chiv 4 Tos Huab Tais - Xyoo C )
  • Zaj nyeem 1 : Mis Kes Tsab Ntawv 5,1-4
1 Npes Les Hes Es Fas Tas, tus me tshaj hauv Yus Das cov xeem, kuv yuav ua tawm ntawm koj tus yuav tswj His Xais Lais. Nws lub keeb chiv puag thaum hauv paus txheej laus thaum ub.
2 Nws tau tso lawv pov tseg mus txog thaum tus yuav yug me nyuam yug tau me nyuam. Pawg seem hauv nws cov kwv tij yuav rov los nrog His Xais Lais cov me nyuam.
3 Nws yuav sawv tsees los, nws yuav saib nws pab tsiaj muaj Huab Tais lub hwj huam, muaj nws tus Tswv Ntuj lub npe nto koob meej. Lawv yuav tau nyob thaj yeeb, nws yuav muaj hwj huam loj mus txog puag npoo ntiaj teb.
4 Nws tus kheej yog kev thaj yeeb.

  • Zaj nyeem 2 : Hes Nplaws 10, 5-10
5 Vim qhov ntawd, thaum Leej Pleev los nyob ntiaj teb no, nws thiaj hais tias : “Tswv Ntuj, cov thaj txi Ntuj thiab cov paj tshab, mas koj tsis xav yuav, koj thiaj puab ib lub cev rau kuv.
6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais.
7 Kuv thiaj hais tias : “Tswv Ntuj, kuv tuaj ua raws li koj nyiam, raws li riam Ntawv sau hais txog kuv”.
8 Leej Pleev xub hais tias :
“Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis zoo siab txais : tej ntawd yog tej yam uas Txoj Cai qhia kom cev.
9 Leej Pleev hais ntxiv tias :
“Kuv tuaj ua raws li koj nyiam.” Li ntawd, Leej Pleev rhuav thawj txoj cai, nws tsa ib txog tshiab los hloov.
10 Vim
nws tau ua qhov zoo no, mas peb thiaj ntshiab tuaj. Yes Xus Pleev cev nws lub cev ib zaug xwb, ces peb ntshiab mus li.

  • Lus Kas Ntawv Moo Zoo 1,39-45
39 Thaum lub hnub nyoog ntawd, Mab Liab sawv kev tsees maj nroos mus pem toj siab, pem lub nroog nyob cheeb tsam Yus Das.
40 Nws chaws mus hauv Ntxas Kas Lias tsev thiab hu Es Lis Xas Npes.
41 Xyov ua cas thaum Es Lis Xas Npes hnov dheev Mab Liab hu nws, tus me nyuam hauv nws plab dhia ib rhees thiab Es Lis Xas Npes cia li muaj Leej Ntuj Plig Ntshiab puv nws.
42 Nws cia li tsa suab nrov hais tias : "Koj, tus muaj hmoo tshaj tsoom poj niam huv tib si thiab lub txiv hauv koj plab yog koob hmoo.
43 Uag, ua cas muaj li ntawd rau kuv yuam, kuv tus Huab Tais leej niam tuaj ntawm kuv ?
44 Koj saib, thaum kuv ntsej hnov dheev koj lub suab hu kuv, tus me nyuam hauv kuv plab dhia ib rhees zoo siab hlo.
45 Thiab zoo siab heev rau tus muaj siab ntseeg yam yuav tsheej xeeb Huab Tais tau hais rau nws.




0 commentaires: