COV ZAJ NYEEM RAU HNUB CHIV 01/11/2009
( Tas Tsoom Leej Ntshiab - xyoo B )

(Hais lus Hmoob - En Français)

• Zaj Nyeem 1 : Ntawv Qhib Yav Tom Ntej (7, 2-4.9-14)

2 Kuv pom ib tug tshiab tawm sab hnub tuaj nqa Tswv Ntuj tus ciaj sia lub ntaus cim. Nws hu ib suab muaj ceem rau plaub tug tshiab txais lub peev xwm rhuav daim av thiab dej hiav txwv
3 “Nej txhob rhuav daim av thiab hiav txwv, thiab xyoob ntoo ua ntej peb ntaus cim rau saum Tswv Ntuj cov tub txib hauv pliaj tso”
4 Kuv hnov muaj npaum no leej cov lawv ntaus cim rau : ib puas plaub caug plaub txhiab leej tas kaum ob lub xeem His Xais Lais, ib xeem kaum ob txhiab leej.
9 Dhau ntawd tas, kuv pom ib npoj neeg coob suav tsis txheeb ; ib npoj neeg tas txhua teb chaws, txhua xeem neeg, txhua haiv neeg, txhua xeem lus. Lawv sawv ntsug ntawm lub theej kiab hauv ntej thiab ntawm Leej Yaj hauv ntej, hnav lawv cov tsoos dawb tuav tej rev nplooj ntawm tes.
10 Lawv hu suab nrov nkoov : “Lub zog yeej tuaj ntawm peb tus Tswv Ntuj tuaj, tus zaum saum lub theej kiab, vim Leej Yaj !”
11 Tas tsoom tshiab sawv koos lub theej kiab, ncig rau cov Laus thiab plaub leeg ciaj sia, sawv daws pe lub theej kiab, ntsej muag ti av, hawm Tswv Ntuj.
12 Lawv hais tias : “Ua li, lus qhuas, hwj chim, thoob tsib, txiaj ntsim, koob meej, hwj huam thiab zog loj rau peb tus Tswv Ntuj, mus tas ib txhiab ib txhis ! Ua li.”
13 Ib tug Laus txais lo lus hais kuv tias : “Tas cov neeg hnav tsoos dawb no, lawv yog leej twg ? Lawv tuaj qhov twg tuaj ? ”
14 Kuv teb nws tias : “Huab Tais, yog koj thiaj li paub.” Nws rov hais tias : “Lawv los ntawm kev raug hiam los. Lawv ntxhua lawv tej tsoos thiab muab zawv huv hauv Leej Yaj cov ntshav.”

• Zaj Nyeem 2 : Zam tsab ntawv 1 (Jn 3, 1-3)

1 Nej ntsia saib, Leej Txiv txoj kev nyiam peb loj tas npaum no : yam li peb hu ua Tswv Ntuj cov me nyuam, peb yog Tswv Ntuj cov me nyuam tiag ! Lub ntiaj teb neeg tsis paub peb, vim ntiaj teb neeg tsis paub Leej Txiv.
2 Cov zoo nyiam, nyem no, peb yog Tswv Ntuj cov me nyuam. Qhov uas yav tom ntej peb yuav plhis mus zoo li cas, tseem tsis tau tawm los rau qhov muag pom xyeem. Peb paub tias, thaum Leej Pleev yuav tawm los rau qhov muag pom xyeem, mas peb yuav zoo li Nws, vim nws zoo li cas, mas peb yuav pom Nws zoo li ntawd.
3 Tus twg tso siab rau Leej Pleev, mas Leej Pleev yuav ua kom nws huv tuaj, vim Leej Pleev yog tus huv.
4 Tus twg tso siab rau Leej Pleev, mas Leej Pleev yuav ua kom nws huv tuaj, vim Leej Pleev yog tus huv.

• Mas Tais Ntawv Moo Zoo (5,1-12)

1 Yes Xus pom ib npoj neeg coob caum nws, nws nce mus saum lub roob. Nws zaum, nws cov thwj tim txav los ze nws.
2 Nws tsa ncauj qhuab qhia lawv. Nws hais tias:
3 Cov nplooj siab nplooj ntsws pluag, hmoov zoo, vim Ntuj Lub Tsheej yog lawv tug.
4 Cov siab zoo, hmoov zoo, vim lub teb chaws npaj tseg lawv yuav txais ua lawv tug.
5 Cov quaj kev tu siab, hmoov zoo, vim yuav muaj tus nplij lawv.
6 Cov tshaib thiab nqhis kev ncaj ncees, hmoov zoo, vim yuav muaj tus daws lawv nqhis.
7 Cov hlub neeg, hmoov zoo, vim yuav muaj tus hlub lawv.
8 Cov siab dawb, hmoov zoo, lawv yuav pom Tswv Ntuj.
9 Cov nrhiav kev thaj yeeb, hmoov zoo, luag yuav hu lawv ua Tswv Ntuj tub ki.
10 Cov raug hiam vim kev ncaj ncees, hmoov zoo, Ntuj Lub Tsheej yog lawv tug.
11 Thaum luag thuam nej, hiam nej, thiab liam ntau yam phem rau nej tim kuv, nej hmoov zoo.
12 “Zoo nej siab tsis zoo thiab ua nej nplooj ntsws hom khaj, vim nej yuav txais koob haum loj nyob saum ntuj. Cov yaj saub ua nej ntej kuj raug luag hiam tib yam thiab.”

(Mus nyeem tsab ntawv nthuav Ntawv Ntshiab)

LECTURES DE LA MESSE DU 01/11/2009

( Messe de la Toussaint - année B )

(Hais lus Hmoob - En Français)

• 1ère lecture : Lecture de l'Apocalypse de saint Jean (Ap 7, 2-4.9-14)

Moi, Jean, j'ai vu un ange qui montait du côté où le soleil se lève, avec le sceau qui imprime la marque du Dieu vivant ; d'une voix forte, il cria aux quatre anges qui avaient reçu le pouvoir de dévaster la terre et la mer : « Ne dévastez pas la terre, ni la mer, ni les arbres,avant que nous ayons marqué du sceaule front des serviteurs de notre Dieu. » Et j'entendis le nombre de ceux qui étaient marqués du sceau : ils étaient cent quarante-quatre mille, de toutes les tribus des fils d'Israël. Après cela, j'ai vu une foule immense, que nul ne pouvait dénombrer, une foule de toutes nations, races, peuples et langues. Ils se tenaient debout devant le Trône et devant l'Agneau, en vêtements blancs, avec des palmes à la main. Et ils proclamaient d'une voix forte : « Le salut est donné par notre Dieu, lui qui siège sur le Trône, et par l'Agneau ! » Tous les anges qui se tenaient en cercle autour du Trône, autour des Anciens et des quatre Vivants, se prosternèrent devant le Trône, la face contre terre, pour adorer Dieu. Et ils disaient : « Amen !Louange, gloire, sagesse et action de grâce, honneur, puissance et forceà notre Dieu, pour les siècles des siècles ! Amen ! » L'un des Anciens prit alors la parole et me dit : « Tous ces gens vêtus de blanc, qui sont-ils, et d'où viennent-ils ? » Je lui répondis : « C'est toi qui le sais, mon seigneur. » Il reprit : « Ils viennent de la grande épreuve ; ils ont lavé leurs vêtements,ils les ont purifiés dans le sang de l'Agneau. »

• 2ème lecture : Lecture de la première lettre de saint Jean (1 Jn 3, 1-3)

Mes bien-aimés, voyez comme il est grand, l'amour dont le Père nous a comblés : il a voulu que nous soyons appelés enfants de Dieu - et nous le sommes. Voilà pourquoi le monde ne peut pas nous connaître : puisqu'il n'a pas découvert Dieu. Bien-aimés, dès maintenant, nous sommes enfants de Dieu, mais ce que nous serons ne paraît pas encore clairement. Nous le savons : lorsque le Fils de Dieu paraîtra, nous serons semblables à lui parce que nous le verrons tel qu'il est. Et tout homme qui fonde sur lui une telle espérance se rend pur comme lui-même est pur.

• Évangile de Jésus Christ selon saint Matthieu (Mt 5, 1-12a)

Quand Jésus vit toute la foule qui le suivait, il gravit la montagne. Il s'assit, et ses disciples s'approchèrent. Alors, ouvrant la bouche, il se mit à les instruire. Il disait : « Heureux les pauvres de coeur : le Royaume des cieux est à eux ! Heureux les doux : ils obtiendront la terre promise ! Heureux ceux qui pleurent : ils seront consolés ! Heureux ceux qui ont faim et soif de la justice : ils seront rassasiés ! Heureux les miséricordieux : ils obtiendront miséricorde ! Heureux les coeurs purs : ils verront Dieu ! Heureux les artisans de paix : ils seront appelés fils de Dieu ! Heureux ceux qui sont persécutés pour la justice : le Royaume des cieux est à eux ! Heureux serez-vous si l'on vous insulte, si l'on vous persécute et si l'on dit faussement toute sorte de mal contre vous, à cause de moi. Réjouissez-vous, soyez dans l'allégresse, car votre récompense sera grande dans les cieux ! »

Nruab Xyoo 31 Tim 01.11.2009

Tsoom niam txiv kwv tij neej tsa phooj ywg mloog Tswv Ntuj lus,

Hnub no, yog ib hnub dawb hnub huv, tas lub Koom Txoos Kav Tos Liv thoob ntiaj teb ua lub hnub nyoog hwm cov leej ntshiab. Kab ke hwm tsoom leej ntshiab piv tau zoo li yav thaum ub, peb tseem coj dab qhuas, thaum muaj ib pluag noj, yus niam yus txiv teem caij teem nyoog hu plig niam plig txiv, hu poj koob yawm txwv tuaj noj tuaj haus, tuaj roos tuaj thaiv, tuaj pov hwm pov yawm tub ki xeeb leej xeeb ntxwv. Peb hais tias : laig dab. Thaum muaj noj muaj haus, yuav tau laig poj koob yawm txwv, caw lawv tuaj nrog noj nrog haus. Vim Hmoob ntseeg poj koob yawm txwv tej koob hmoov yuav pab tuaj thaiv tuaj roos tej tub ki thiab xeeb leej xeeb ntxwv.

Peb los ntseeg Tswv Ntuj hauv lub Koom Txoos Kav Tos Liv. Peb kuj muaj kab ke hwm cov neeg dua nra lawm. Peb kuj nco txog cov txheeb ze, tej poj koob yawm txwv tej koob hmoov txhawb txhim yus tseem ua neej nyob. Tiam sis tsis yog yuav ua li qub, taug txoj qub ke, muab diav muab phaj daus zaub daus mov ntawm rooj laig ib leeg zuj zus thiab ib txheej zuj zus phaj txiv, phaj yawg, yawg koob…kom txhua li Hmoob ua kam. Peb los ntseeg Tswv Ntuj lawm, peb hwm peb nco txog lawv cov dua nra, tiam sis peb ua txawv qub, peb muaj tuav lawv npe thiab teev Tswv Ntuj xwb.

Nyob hauv lub Koom Txoos Kav Tos Liv, niaj lub xyoo hnub xiab 1 lub 11 hlis ntuj, yog hnub tas tsoom ntseeg Kav Tos Liv thoob ntiaj teb ua hmoov hwm tsoom leej ntshiab. Yog ib txoj kab ke tshiab rau peb Hmoob Kav Tos Liv taug. Kab ke tshiab, vim cov leej ntshiab tsis yog yus caj ces xwb, tsis yog yus xeem Hmoob xwb. Cov leej ntshiab puav leej yog tas ntiaj teb tib neeg txhua haiv neeg, txhua xeem neeg cov zoo. Peb hwm tsoom leej ntshiab, yog hwm tag ntiaj teb tib neeg cov ncaj ncees dua nra tas. Peb ua hnub nyoog nco txog lawv, vim thaum lawv tseem ua neej nyob, lawv tau ua neeg siab ncaj ncees, ua siab dawb siab huv hlub tshua lawv tsev neeg, hlub lawv tej txheeb ze thiab hlub luag tej tib neeg tus deb tus ze sib npaug zos. Lawv tau muab lawv txoj sia los ua txiaj ua ntsim hlub neeg zoo tam ntuas Tswv Ntuj hlub neeg. Lawv tau ua tej tib neeg sawv daws niam thiab txiv tiv thaiv plaub ntug, ua tij ua viv ntxiv ntxhua thiab hlub tib neeg sawv daws, pab sawv daws zoo cuag li Yes Xus tau hais tau qhia kom ua. Muaj ntau zaus, lawv tau muab lawv txoj sia los ua dej ua tshuaj cawm neeg, khuv leej neeg. Muab piv li leej ntshiab Maxim ilien Kolbe lub neej.

Thaum lub caij ua tsov ua rog ntiaj teb, nyob sab Aws Los Pas 1939, lub teb chaws Yes Los Mas sawv tua cov teb chaws Aws Los Pas, yam li Fab Kis, As Kiv, Npes Ntsiv, Pos Looj…Maximilien Kolbe yog neeg Pos Looj. Nws raug cov tub rog Yes Los Mas ntes kaw hauv nkuaj nyob lub yeej Auschwitz. Yog cov neeg nyob nkuaj nyiag kev khiav dim ib leeg. Mas cov tub rog yuav tsum pauj kom tau tus khiav dim, 1 pauj 10. Yam li khiav 1 leeg dim, 10 leej yuag tsum tuag taj. Txawm li cas los, cov neeg nyob nkuaj yeej txhaum tag nrho. Hnub ntawd, muaj ib tug nyiag kev khiav lawm, cov tub rog cia li taw tes rau 10 leej txiv neej, cab mus tua pov tseg. Muaj ib tug txiv tsev, tsa suab hlo quaj tsis taus thov kom lawv txhob tua nws. Tshuav nws tej poj niam tub se. Maximilien Kolbe nam zog los hais rau tus tub rog tias : kom tso tus txiv tsev ntawd. Kuv yog ib tug txiv plig Kav Tos Liv. Kuv zoo siab tuag taj tus txiv tsev lub chaw. Tus tub rog xav tswv yim ntev loo. Nws hais rau nws tus loj tias : yog ib niag txiv plig…Ces lawv tso tus txiv tsev. Lawv cab Maximilien mus tua lawm. Niaj hnub no, tus txiv tsev tseem ua neej nyob.

Maximilien lub neej haum rau hnub no, lub Koom Txoos ua hmoov hwm cov leej ntshiab. Lub Koom Txoos nco txog cov poj niam thiab txiv neej txij puag thaum Yes Xus thiab nws cov thwj tim tsa lub Koom Txoos sawv los txog lub sij hawm no, cov tau coj lawv lub neej mus raws nraim li Huab Tais Yes Xus cov lus qhia. Lawv tau rub lawv lub siab lub ntsws los hlub leej tib neeg xws li yog Yes Xus hlub neeg. Lawv tau muab lawv cev nqaij daim tawv los tiv hniav ntaj hniav riam xws li Yes Xus thws nws nrob qaum rau lawv nplawm, muab nws xib teg xib taws rau lawv xuas ntsia hlau ntsia dai saum ntoo cuam poob tsim li tus neeg phem, nrog cov tub sab luag muab dai saum ntoo cuam ris lawv cov txim txhaum “Tas cov neeg hnav tsoos dawb no, lawv yog leej twg ? Lawv tuaj qhov twg tuaj ?...Lawv los ntawm kev raug hiam los. Lawv ntxhua lawv tej tsoos thiab muab zawv huv hauv Leej Yaj cov ntshav.” Daim ntaub dawb, yog daim ntaub tsis muaj qhov tsuas, nws dawb nws huv lis si. Cov neeg hnav tsoos dawb, yog daim tsoos dawb peb tau hnav hnub peb txais lub cim ntxuav. Txij hnub peb tau txais lub cim ntxuav cog lus nrauj dab Xas Tas pov tseg, tus dab ntxias neeg. Peb cog lus ntseeg Tswv Ntuj, zwm huab Tais Tswv Ntuj, peb los hnav ib lub zam tshiab, ib lub zam huv. Yes Xus yog peb lub zam dawb thiab huv. Peb ua Yes Xus neeg. Peb yug dua tshiab dawb huv tsis lo txhaum li Yes Xus. Peb yuav tau txuag peb lub zam kom nyob tshiab khiv dawb huv li Yes Xus cov kwv cov muam, tsim nyog ua nws haiv neeg. Peb txuag peb lub zam kom dawb huv, peb yuav txuag li cas ? Yog ua Yes Xus tes qav num li Yes Xus txib kom peb ua. Tsis yog puag tes puag taws nyob. Tsis yog nyias nrhiav nyias kev tau zoo li neeg lub siab ntshaw. Yes Xus muab hauj lwm cob rau peb ua. Peb yuav tau khaws nkaus ua txhob yig, ua neeg nquag, ua neeg khwv npaum li Yes Xus. Peb txuag peb lub zam dawb tsis pub tsuas, tsis yog peb yuav muab hle tais khaws zoo tseg rau phij xab cia hauv txaj chaw pw. Yog yus hnav yus daim tsoos dawb teev ntuj hwm ntuj, yus hnav mus leg Yes Xus tes qav num, muab ncej puab ua tog zaum, caj npab ua hauv ncoo rau cov neeg laus, neeg muaj mob muaj nkeeg, mus pab neeg txom nyem, neeg pluag, mus saib neeg nyob nkauj, mus plws tej tub ntsoj ntxhais ntsuag, poj ntsuam…rub lawv tes rau yus nqaws tiab nqaws awv puav tam li Yes Xus. Yus hnav yus cev tsoos dawb mus tiv plaub ntug, tiv hniav ntaj hniav riam li Maximilien Kolbe cawm tus txiv tsev. Qhov kawg, tsis yog xuas tshuaj xuas dej zawv yus lub zam dawb li yus zawv yus cev ris tsho. Yus ntxhua thiab zawv yus daim tsoos dawb huv hauv Leej Yaj cov ntshav. Vim li ntawd, hnub no, yog ib hnub hwm cov leej ntshiab, yog ib hnub loj rau tag peb sawv daws cov tau txais lub cim ntxuav, hnav Yes Xus lub zam dawb, muaj Yes Xus lub hwj chim.

Tsis tas li ntawd, peb yog npoj neeg coob caum Yes Xus. Hnub no, Yes Xus qhuab qhia peb, hais txog cov muaj hmoo, cov hmoov zoo yog cov zoo li cas ? Yog cov pluag, yog cov siab zoo, cov quaj kev tu siab, cov tshaib nqhis kev ncaj ncees, cov hlub neeg…lawv yog cov muaj hmoo.

Yog peb cuab pob ntseg mloog Yes Xus, cov lus hauv ntawv Moo Zoo hnub no, Yes Xus hais rau peb. Peb yog npoj neeg coob caum Yes Xus. Huav npoj neeg coob tuaj ntsauv Yes Xus, tuaj mloog Yes Xus hnub ntawd, muaj cov ncaj, muaj cov nkhaus, muaj cov tub sab, muaj cov siab dawb, muaj cov siab nyoos tua neeg, muaj cov hlub neeg…tus neeg zoo li cas puav leej muaj txhij. Sawv daws tuaj ntsauv Yes Xus.

Peb tsis txhob xav qhov yooj yim. Yus ua neeg ntseeg Tswv Ntuj ntawm lub ncauj thiab lo lus hais, ces txaus lawm. Los puas yus ua neeg ntseeg Tswv Ntuj vim yus txais lub cim ntxuav ces yus hauj lwm tiav lawm, paub ntuj lawm. Los puas yus twb mus teev ntuj tsis sav ib zaug li, ces yus zoo zoo txaus, yus tsis muaj txhaum li tej neeg nkees tsis tshwm tsev teev ntuj ib zaug li…Yog peb ua neeg ntseeg Tswv Ntuj, peb coj li ntawd, xav li ntawd hauv siab ntsws mas peb xav qhov yooj yim dhau. Qhov yooj yim peb xav ntawd, peb tsuas xav li tej txhia neeg xav. Peb tsuas coj li tej pawg los tej pab neeg ntseeg xav thiab coj raws lawv siab xwb. Lawv tsis coj li Yes Xus coj, lawv tsis qhia li Yes Xus qhia thiab tsis ua li Yes Xus qhia kom ua. Lawv xaiv qhov yooj yim ua, lawv xaiv txoj num sib ua. Lawv muab lub nra hnyav tso pov tseg, muab qhov nyuaj zais tsis qhia sawv daws paub. Qhov kawg, lawv tsis qhia tseeb Yes Xus cov lus rau sawv daws paub. Lawv qhia ib txoj kev ntseeg ntuj li tej tus xib hwb, los qee tus thawj zaj tswv yim. Lawv tsis muab kev hwm Tswv Ntuj tiag los qhuab qhia neeg, tsis muab Yes Xus lo lus qhuab qhia neeg.

Thaum Yes Xus hais txog cov muaj hmoo : Yog cov pluag, yog cov siab zoo, cov quaj kev tu siab, cov tshaib nqhis kev ncaj ncees, cov hlub neeg…Yes Xus tsis hais nws cov thwj tim niaj hnub raws Yes Xus xwb. Yes Xus hais tag nrho cov thwj tim thiab npoj neeg tuaj ntsauv nws mloog nws hnub ntawd thiab tag nrho leej tib neeg thoob ntiaj teb tib si. Yes Xus suav txog sawv daws, vim cov pluag, cov siab zoo, cov quaj kev tu siab, cov tshaib nqhis kev ncaj ncees, cov hlub neeg…muaj thoob ntiaj teb. Tsis kawg cov neeg ntseeg Tswv Ntuj thiaj zoo, kuj tsis kawg cov tseem coj dab qhuas thiaj zoo…Muaj tseeb tiag, hauv cov ntseeg Tswv Ntuj kuj muaj cov nkhaus cov phem, cov tua neeg. Hauv cov neeg tseem coj dab qhuas kuj muaj cov nkhaus cov phem tib yam. Vim li ntawd, Yes Xus thiaj hais tias : cov pluag, cov siab zoo, cov quaj kev tu siab, cov tshaib nqhis kev ncaj ncees, cov hlub neeg…yog cov muaj hmoo, cov hmoov zoo.

Peb yuav tau sib pab, sib txhawb kom peb ua siab loj siab dav, kwv tij neej tsa phooj ywg sawv daws. Yus tsis txhob ntshai ua siab loj hlub neeg. Tus tsis zoo nyiam los yuav taus hlub, yuav tau nyiam nws tshaj cov. Yog lub Moo Zoo tuaj ntawm Yes Xus tuaj. Yog peb tus kheej xwb, peb yuav zam tsis tau rau tus tib neeg ua txhaum, ua siab peb, saib tsis taus peb. Tiam sis vim peb yog npoj neeg raws Yes Xus thiab ntseeg Yes Xus, peb zoo siab ris tiag lub nra no tsuam peb ntog los yuav tau sawv ris mus txo ntawm Yes Xus xub ntiag. Kwv tij, txoj hauj lwm sib, tej kev pauj, kev cib nyeej yog yam yuav tsuas yus lub tsoos dawb tsis huv lawm. Peb leej twg hlub neeg, nws txoj hmoov zoo. Peb thov kom Huab Tais Yes Xus pab peb nrog peb txuag peb lub tsoos kom dawb thiab huv thiab pub ib rev nplooj rau peb tuav ntawm tes ua koob ua hmoov.


Cwj Vuam Chiv 28.10.2009

COV ZAJ NYEEM RAU HNUB CHIV 25/10/2009
( Hnub chiv 30- xyoo B )

(Hais lus Hmoob - En Français)

• Zaj nyeem 1 : Phau Ntawv Yes Les Mias (31,7-9)

7 Huab Tais hais li no : "Kav tsij qw ntsuag qees kev zoo siab rau Yas Kos, qhuas thawj lub teb chaws !Cav nej cov lus zoo ncha ntws, tas sawv daws qw ntsuag qee : Huab Tais, cawm koj haiv neeg, His Xais pab neeg seem !
8 Saib kuv coj lawv pem lub teb chaws qaum teb rov los, kuv sau lawv tim npoo ntiaj teb los ua ke. Nyob hauv lawv muaj tus dig muag thiab tus ceg tawv, tus poj niam cev hnyav thiab tus tseem nyob nruab hlis. Yog ib pab neeg coob sawv kev rov los sib txoos.
9 Thaum lawv mus kua muag nyab yees, kuv coj lawv rov los nplij lawv zoo siab hlo. Kuv yuav coj lawv mus cuag tus niam dej ntws nto taug ib txoj zoo kev tsis muaj tus tsi dawm lawv kev. Vim kuv yog ib leej txiv rau His Xas Lais, Es Fais yog kuv tus tub hlob."

• Zaj nyeem 2 : Hes Nplaws (5,1-6)

1 Tsis hais tus Tuam Leej Choj twg, nws tsuas yog ib tug tawm hauv zeej tsoom los, mas nws ua Leej Choj pab neeg nyob hauv txoj kev fim Tswv Ntuj, pab cev paj tshab txi Ntuj them txim txhaum.
2 Tus Leej Choj hlub taus cov neeg tsis paub dab tsi thiab cov neeg yuam kev, vim tias nws kuj txawj ua txhaum xws li lawv. 3 Vim nws txawj ua txhaum, mas nws yuav tsum ua thaj txi Ntuj them nws cov txhaum, ib yam li nws txi Ntuj them tsoom sid cov txhaum.
4 Tsis muaj leej twg yuav rov muab nws tsa ua leej choj tau. Yog Tswv Ntuj hu nws mas nws thiaj ua leej choj tau, ib yam nkaus li Tswv Ntuj tau hu As Loos.
5 Leej Pleev, kuj tsis tau rov tsa nws ua Tuam Leej Choj muaj hwj chim, nws txais lub hwj chim ntawd ntawm tus hais rau nws tias : “Koj yog kuv Leej Tub. Hnub no, kuv xeeb koj.”
6 Tswv Ntuj tseem hais tias : “Koj ua leej choj mus ib txhiab ib txhis, raws li Mes Kis Xes Des txoj kev.”

• Mas Kos Ntawv Moo Zoo (10,46-52)

46 Thaum Yes Xus nrog nws cov thwj tim thiab ib npoj neeg coob tawm hauv Yes Lis Kos mus, muaj ib tug neeg thov khawv dig muag, Npas Tis Mes, yog Tis Mes tus tub. Nws zaum ntawm ntug kev.
47 Thaum nws paub tias yog Yes Xus Nas Xas Les, nws cia li qw tias : "Yes Xus, Das Vis Leej Tub, khuv leej kuv yuas !"
48 Muaj coob leej cem nws kom ua twj ywm, tab sis nws haj yam qw nrov : "Das Vis Leej Tub, khuv leej kuv yuas."
49 Yes Xus cia li nres nroos thiab hais tias : "Hu nws los." Neeg mus hu tus dig muag thiab hais nws tias : "Tso siab lug, kav tsij sawv tsees, nws hu koj."
50 Tus dig muag pov rhees nws lub tsho loj tseg, tib plhaw mus cuag Yes Xus.
51 Yes Xus hais nws tias : "Koj xav kom kuv ua dab tsi rau koj ?" Las Npus Nis, kom kuv pom kev.
52 Yes Xus hais nws tias : "Rov mus, koj lub siab ntseeg cawm tau koj lawm." Tam sis ntawd, tus neeg cia li pom kev thiab nws raws Yes Xus taug kev mus.

(Mus nyeem tsab ntawv nthuav Ntawv Ntshiab)

LECTURES DE LA MESSE DU 25/10/2009
( Trentième dimanche - année B )

(Hais lus Hmoob - En Français)

• 1ère lecture : Lecture du livre de Jérémie (Jr 31,7-9)

Ainsi parle le Seigneur : Poussez des cris de joie pour Jacob, acclamez la première des nations ! Faites résonner vos louanges et criez tous : « Seigneur, sauve ton peuple, le reste d'Israël ! » Voici que je les fais revenir du pays du Nord, et que je les rassemble des extrémités du monde. Il y a même parmi eux l'aveugle et le boiteux, la femme enceinte et la jeune accouchée ; c'est une grande assemblée qui revient. Ils étaient partis dans les larmes, dans les consolations je les ramène ; je vais les conduire aux eaux courantes par un bon chemin où ils ne trébucheront pas. Car je suis un père pour Israël, Éphraïm est mon fils aîné. Parole du Seigneur.

• 2ème lecture : Lecture de la lettre aux Hébreux (He 5, 1-6)

Lecture de la lettre aux Hébreux Le grand prêtre est toujours pris parmi les hommes, et chargé d'intervenir en faveur des hommes dans leurs relations avec Dieu ; il doit offrir des dons et des sacrifices pour les péchés. Il est en mesure de comprendre ceux qui pèchent par ignorance ou par égarement, car il est, lui aussi, rempli de faiblesse ; et, à cause de cette faiblesse, il doit offrir des sacrifices pour ses propres péchés comme pour ceux du peuple. On ne s'attribue pas cet honneur à soi-même, on le reçoit par appel de Dieu, comme Aaron. Il en est bien ainsi pour le Christ : quand il est devenu grand prêtre, ce n'est pas lui-même qui s'est donné cette gloire ; il l'a reçue de Dieu, qui lui a dit : Tu es mon Fils, moi, aujourd'hui, je t'ai engendré, et qui déclare dans un autre psaume : Tu es prêtre pour toujours selon le sacerdoce de Melkisédek.

• Evangile de Jésus Christ selon saint Marc (Mc 10, 46-52)

Évangile de Jésus Christ selon saint Marc Tandis que Jésus sortait de Jéricho avec ses disciples et une foule nombreuse, un mendiant aveugle, Bartimée, le fils de Timée, était assis au bord de la route. Apprenant que c'était Jésus de Nazareth, il se mit à crier : « Jésus, fils de David, aie pitié de moi ! » Beaucoup de gens l'interpellaient vivement pour le faire taire, mais il criait de plus belle : « Fils de David, aie pitié de moi ! » Jésus s'arrête et dit : « Appelez-le. » On appelle donc l'aveugle, et on lui dit : « Confiance, lève-toi ; il t'appelle. » L'aveugle jeta son manteau, bondit et courut vers Jésus. Jésus lui dit : « Que veux-tu que je fasse pour toi ? — Rabbouni, que je voie. » Et Jésus lui dit : « Va, ta foi t'a sauvé. » Aussitôt l'homme se mit à voir, et il suivait Jésus sur la route. Haut de page

Nruab Xyoo 30 Tim 25.10.2009


Ib tsoom niam txiv kwv tij neej tsa phooj ywg ua Tswv Ntuj tub ki mloog Tswv Ntuj lus,

Twb rov txog hnub peb tuaj pe hawm Tswv Ntuj ua ke, ntawm peb lub chaw nyob, ntawm peb lub zos. Peb ua neeg ntseeg hauv lub Koom Txoos Kav Tos Liv, peb yog lub Koom Txoos Kav Tos Liv tib neeg. Koom Txoos Kav Tos Liv sawv Yes Xus npe qhuab qhia lub Moo Zoo. Yog tam ntua peb mloog Yes Xus qhuab qhia peb. Hnub no, peb lub Koom Txoos caw peb mloog Yaj Saub Yes Les Mias tsab ntawv thiab mloog Mas Kos tsab ntawv Moo Zoo.

Nej cov nquag nyeem phau Ntawv Ntshiab, nej yeej paub Yaj Saub Yes Les Mias, tau hnov dua nws tsab ntawv, mloog dua nws cov lus. Tswv Ntuj tuaj tshoj nws kom sawv Tswv Ntuj npe qhuab qhia cov neeg His Xais Lais yog Tswv Ntuj haiv neeg. Vim tsoom pej xeem His Xais Lais, cov ua txwj laus, ua thawj coj, cov leej choj, cov ua nom, cov ua vaj ua huab tais kav teb chaws, tas sawv daws tsis kub siab mloog Tswv Ntuj lus, nyias xaiv nyias kev yooj yim kev tub nkeeg teev ntuj, nyias tsuas pom nyias kev nrhiav noj nrhiav haus loj, sawv daws xwb fab kev nrhiav nyiaj nrhiav txiaj loj, ua lag ua luam thiaj muaj nqes, mus ua si, mus ua plees ua yis thiaj zoo sawv daws siab…lam coj lub npe ntseeg Tswv Ntuj hwm Tswv Ntuj, siab ntsws xwb fab kev liam txwv thiab ua dog dig…« Koj puas pom His Xais Lais cav ncauj ? Lub roob twg siab nws nce mus txhua, tsob ntoo twg ntsuab, lub qab ntoos ua nws chaw daj dee txhua. Kuv cav vam tias ua txaus siab, nws yuav rov los thawj kuv. Tiam sis nws tsis los. Yus Das, nws tus viv ncaus muaj plus, pom li ntawd. Nws pom kuv muab His Xais Lais cav ncauj nrauj tseg vim nws kev deev hluas. Yus Das muaj plus, tsis txawj txaj muag, khaws nkaus kev deev hluas ua YLM3,6-8. » Tswv Ntuj haiv neeg muaj ntau ntau xeem li peb Hmoob.

Tswv Ntuj muab His Xais Lais thiab Yus Das piv rau tus poj niam tsis puab cuab, piv rau tus poj niam deev hluas. Vim His Xais Lais tsis nco Tswv Ntuj tej txiaj ntsim Tswv Ntuj tau hlub lawv, cawm lawv ntawv kev ua qhev raug luag tsim txom thaum ub nyob Hais Nkws Tos teb. Tom qab, thaum lawv muaj noj muaj haus, tsis tshaib tsis nqhis, lawv siab tsis npuab, tsis quav ntsej Tswv Ntuj. Lawv yeem mus mloog tej saub cuav zaj ncauj qab zib nplaig qab ntse, mus coj tej pej kum neeg tej dab qhuas dog dig. Sawv daws mus zaum tsheej pawg tham haus dej haus cawv qaug tsis ua num, mus twv txiaj yuam pov. Thaum poob nyiaj txiag, sawv daws sib ntaus sib nrig, sib ntxub sib tua. Tswv Ntuj hais rau Yes Les Mias kom nkag mus hauv nroog, taug cov kev hauv Yes Lus Xas Les kom txhua txoj : « rua muag ntsia, nug tus ub tus no, xam ncig lees tej kev tshuam, puas pom muaj ib leeg twg yog neeg ncaj ncees, hais qhov tseeb qhov yog : yog muaj, kuv yuav ntev zam rau lub nroog no, Huab Tais hais li ntawd YLM5,1. » Yes Les Mias ceeb toom rau tas tsoom His Xais Lais. Lub teb chaws yuav raug xwv txheej. Neeg yuav raug txom nyem, yuav tuag hniav ntaj hniav riam, tuag lwj liam tsis muaj qua ntxa. Tsis tas li ntawd xwb, lub teb chaws yuav tawg puas ntsoog, tsis muaj vaj ntxwv thiab huab tais kav, tej vaj tse yuav nqha nrig thiab zej zog yuav kub hnyiab ua hluav tas, tej tsev txoos, tsev teev ntuj yuav pob vau tas tsis tshuav leej choj nyob qhov twg, cov muaj txoj hmoo tsis tuag yuav raug ntes cab mus ua qhev rau pej kum teb… « Tus noog ya saum ntuj twb paub caij nyoog, tus noog liaj noog luv los tus uab tsom caij nyoog yuj. Kuv haiv neeg tsis paub Huab Tais kev ncaj ncees YLM8,7. » Neeg tau zoo dhau lawm, tsis txob tsis txhawj. Sawv ntxov, qee caij nyoog mus teev ntuj, tsis tau pw, khwv dhau…Thaum neeg liam txwv tuaj tseem poob qis tshaj tsiaj txhu…

Cov tub rog Npas Npis Los Nias ua teb ua chaw, tuaj txeeb tau His Xais Lais teb, rhuav lub teb chaws puas ntsoog, tua lawv tej nom, ntes lawv cov vaj, tua neeg tuag coob, hlawv tej zej zog, rhuav vaj tse, lwg nyiaj txiag thauj nqa lawm du lug, ntes khi cab tsoom His Xais Lais mus raug txim ua qhev nyob Npas Npis Los teb 70 xyoo. Tiam sis Yes Les Mias hais tau ib los tseg tias cov yuav rov qab los nyob lawv qub teb qub chaw, qub zej qub zog, qub vaj qub tse yog cov His Xais Lais ncaj, cov seem, cov hwm ntuj, cov tso siab rau Huab Tais, cov muab lawv lub siab tso npuab Huab Tais ciaj thiab tuag : « Saib kuv coj lawv pem lub teb chaws qaum teb rov los, kuv sau lawv tim npoo ntiaj teb los ua ke. Nyob hauv lawv muaj tus dig muag thiab tus ceg tawv, tus poj niam cev hnyav thiab tus tseem nyob nruab hlis. Yog ib pab neeg coob sawv kev rov los sib txoos »

Tej zaum peb yuav tau khaws Yes Les Mias cov lus no tseg coj los xav rau peb lub neej tam sis no. Nws yuav qhuab qhia peb lub siab tsob hwb Tswv Ntuj, pab txhawb peb lub neej zim txwv no. Tsis yog ib zaj dab neeg muab hais laug caij laug nyoog pov tseg. Niaj hnub no, peb lub neej tawg rog mus tib yam li tsoom His Xais Lais thaum ub. Peb kuj muaj cov neeg lub ncauj lam los ntseeg Tswv Ntuj xwb. Tej siab ntsws yeej tsis tau hloov, tseem coj, tseem teev dab qhuas li qub, tseem mus saib neeb saib yaig, tsis tso siab tag rau Huab Tais Tswv Ntuj. Lub npe lam ua neeg ntseeg, sim neej tsis tshwm hauv tsev teev ntuj, tsis txawj hais ib los ua Tswv Ntuj tsaug tej txiaj ntsim Tswv Ntuj tau pub rau yus. Pom muaj tej niam txiv rhuav lawv lub neej puas tsuaj tas, vim tus txiv deev luag txij luag nkawm, los puas, tus niam khiav mus caum hluas nraug, tseg tej me nyuam ua ntsuag ciaj khaub ntshaw luag tej niam tej txi lo lus hlub, lo lus nqee, plam plhuav lawv sim neej yug los ciaj neeg tsis nrog luag muaj niam muaj txi hlub. Qee hnub, peb tus kheej kuj pauv tsis ntxiv tej neeg yus pom no thiab. Peb tsis txhob tos kom hnub peb zoo zoo, khoom khoom peb li mus teev ntuj. Peb txawm ceg tawv, dig muag, cev hnyav, nyob nruab hlis…Peb kav tsij maj zeeg mus teev Tswv Ntuj kiag li peb ceg tawv los dig muag… Yog peb qhov paj tshab ntxim Tswv Ntuj siab, tsis muaj qhov dag, tsis muaj qhov cuav, peb mus teev ntuj li peb tus kheej. Peb tus kheej zoo li cas, peb mus pe Tswv Ntuj zoo li ntawd. Yuav tsis txhob qeeb siab, txhob siab hnyav, txhob muab lub caij teev ntuj ncua rau lwm zaus, lwm hnub : “Kuv yuav coj lawv mus cuag tus niam dej ntws nto taug ib txoj zoo kev tsis muaj tus tsi dawm lawv kev. Vim kuv yog ib leej txiv rau His Xas Lais, Es Fais yog kuv tus tub hlob.”

Thaum Huab Tais Yes Xus mus tshaj nws cov lus cawm lub ntiaj teb neeg. Nws sau tag tus phem tus zoo, cawm tag sawv daws kom dim ntawm nyias cov txhaum. Vim leej tib neeg tsis hais tus zoo neej los muaj mob, tus muaj los tus pluag, tus muab hlob los tus neeg me, tus poj niam los tus txiv neej, tus ciaj los tus tuag…tas tib neeg puav leej lo txhaum, muaj txhaum. Leej Txiv xa nws Leej Tub tuaj cawm tib neeg, daws tib neeg lub txhaum muab tib neeg pav thiab khi ruaj ruaj kom tso tib neeg dim los ua neeg ncaj, kom ntshiab kom huv ua Tswv Ntuj tub ki.

Mas Kos zaj ntawv Moo Zoo piav txog Yes Xus kho tus dig muag pom kev muaj ob txheej lus peb yuav tsum pom thiab ntseeg raws li Yes Xus qhia:

1-Txheej lus ib : Peb leej tib neeg lub cev nqaij thiab txha, muaj nuj nqes nyob ntiaj teb no thiab Tswv Ntuj saib peb muaj nqes. Peb lub cev noj qab nyob zoo, peb muaj kev zoo siab. Tswv Ntuj nrog peb zoo siab. Peb lub cev muaj mob, noj tsis qab nyob tsis zoo, peb muaj kev txob txhawj, nyuaj siab ntxhov plawv. Huab Tais nrog peb nyuaj, nrog peb txhawj. Tus dig muag ua lub neej tsaus ntuj nti, tsis pom qab mus txoj ke twg, tsis tau nrog luag sib tw ua neej…niaj hnub zaum qhov qub chaw thov khawv, tau txiaj puav nyuag nyiaj daws qhis…xyov yuav ua cas ua neej mus txog hnub kawg. Tus dig muag txom nyem kawg kiag, kev nyuaj siab ib hnub tsaus nti tsis txawj tag. Tswv Ntuj nrog tus dig muag nyuaj siab tsis txawj tag sib npaug zos. Yes Xus thiaj hla los ze ntawm tus dig muag lub chaw. Nws qw, nws thov Yes Xus pab nws tag nws lub siab. Luag tej tsis dig, luag tsis quav ntsej nws, tsis paub nws kev tsaus ntuj ua hnub ua hmo. Luag kom nws ua twj ywm txhob qw txaj muag, taug pob ntseg. Tiam sis nws yim huab qw nrov. Tib neeg tsis muaj hwj huam, yuav pab tsis tau nws. Tiam sis Yaj Saub Yes Xus, muaj hwj huam yuav pab yuav cawm nws, yuav daws nws kev nyuaj siab kev tsaus ntuj pov tseg.

Kheev lam peb cov neeg ntseeg Tswv Ntuj, muaj lub siab tsob hwb Tswv Ntuj, vam Huab Tais Yes Xus pab peb daws peb kev nyuaj siab zoo npaum li tus dig muag. Tsis muaj yam dab tsis yuav thaiv peb kev tso siab loj thiab tag nrho rau Yes Xus. Peb kuj yuav pom Yes Xus sawv ntawm peb ib sab, hais lus rau peb, pab peb tib yam li Yes Xus pab tus dig muag : “Koj xav kom kuv ua dab tsi rau koj ?”

Vim li ntawd, tsis nyog tib neeg muab tib neeg lub cev mus ua lag ua luam, pauv nyiaj pauv txiaj, ua dev ua npua. Tsis nyog tej poj niam mus rho, mus thau me nyuam pov tseg. Ris lub txim tua neeg tib yam tus txhaum luag muab kaw hauv tsev loj faj. Tsis nyog tib neeg yuav sib ntaus sib tua, ua tsov ua rog tuag, sib ntxub, ciaj caub. Tswv Ntuj nrog cov me nyuam mos txom nyem, nrog cov quaj ntsuag nyuaj siab tsis tag…

2-Txheej lus ob : Peb lub siab thiab peb lub tswv yim yuav txawj xav thiab pom kom deb tshaj peb lub cev nqaij daim tawv thiab peb lub qhov muag pom tau. Hmoob hais tias xyaum ua neeg thoob tsib, ua neeg ntse. Pos yuav ntse, tsis yuav hliav, neeg yuav ntse, tsis yuav piav. Tus neeg ntse, hais tsawg paub ntau.

Yes Xus tsis yog tus muab hlob khav theeb li tej neeg. Yes Xus tsis tuaj cawm lub ntiaj teb neeg kom neeg qhuas Yes Xus li cov neeg muab hlob zaj. Yes Xus tsis kho tus dig muag kom cov neeg caum nws qhuas nws muaj hwj huam. Yes Xus pab tus dig muag vim tus dig muag ntseeg Yes Xus, tos ntshis Yes Xus hlub nws, pab nws, ua tau kom nws pom kev. Ces txawm muaj tau, ua tau raws li nws lub siab vam Tswv Ntuj, tos Tswv Ntuj tiag : "Rov mus, koj lub siab ntseeg cawm tau koj lawm." Tam sis ntawd, tus neeg cia li pom kev thiab nws raws Yes Xus taug kev mus. Yog ib lub cim qhia rau peb txhia tus tso siab rau Tswv Ntuj paub tseeb. Tej yam yus tos ntsis txog Tswv Ntuj twj ywm hauv yus siab. Yus txawm pom Tswv Ntuj pub rau yus dhos nkaus li yus tos, los puas tseem zoo tshaj qhov yus xav tau ua ntej. Yes Xus hais tias yog yus txoj kev ntseeg pab yus. Neeg pom tias yog hwj huam Tswv Ntuj pab tuaj rau yus.

Peb yuav xyaum coj ib yam tus dig muag. Peb txhob xav tias peb pom kev ces peb tsis dig. Nej puas hnov Hmoob twb yws rau tej me nyuam siab ntsws tsis to nrog : “Tsov tom dig muag, koj tseem tsis pom ntawm no thiab los ! ”

Peb lam muaj siab ntsws, peb lam muaj qhov muag, peb lub npe lam ntseeg Tswv Ntuj, peb zoo li tus dig muag, niaj hnub ncig yuj yeev peb lub qub chaw, ua lub neej qub, coj lub qub siab…Yuav kom peb pom kev, taug txoj kev tshiab, ua lub neej tshiab, hloov lub siab tshiab nyiam Tswv Ntuj tiag…peb yuav vam khom Huab Tais Yes Xus pab peb thiab peb yuav nrog Yes Xus mus ib ncua kev.

Tsoom phooj ywg mloog Tswv Ntuj lus, lwm hnub peb mam rov tuaj sib sau mloog Yes Xus lub Moo Zoo dua.

Cwj Vuam Chiv 20.10.2009

COV ZAJ NYEEM RAU HNUB CHIV 18/10/2009
( Hnub chiv 29- xyoo B )

(Hais lus Hmoob - En Français)

• Zaj nyeem 1 : Cov lus nyob hauv Ntawv His Xais (53,10-11)

10 Huab Tais tshua txog tus tub txib raug mob raug ntsaj ntsoog tas. Yog nws muab nws txoj sia ua txim los theej txhoj, nws lub neej yuav kav ntev, nws yuav pom nws xeeb leej xeeb ntxwv. Huab Tais lub siab nyiam yuav tsheej xeeb hauv nws.
11 Tim nws lub mob lub ntsaj, nws yuav txais qhov pom kev, nws yuav tau zoo puv npo. Vim nws tau raug mob raug ntsaj, kuv tus tub txib, tus ncaj, nws yuav ua kom zeej tsoom ncaj ncees, nws yuav ua tus ris lawv cov txhaum.

• Zaj nyeem 2 : Hes Nplaws (4,14-16)

14 Vim peb muaj Tswv Ntuj Leej Tub Yes Xus ua Tuam Leej Choj thiab ua Vaj, nws hla dhau yim txheej cuaj txheej ntuj, mas peb yuav nyob ruaj nreb hauv txoj kev lees ntseeg.
15 Peb tus Tuam Leej Choj tsis yog ib tug Leej Choj tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam li peb. Tsuas tshuav txoj kev txhaum xwb, nws thiaj tsis raug.
16 Peb kav tsij rhais ruam mus lawm tom ntej. Peb tso siab lug mus kom txog lub theej kiab muaj txiaj ntsim, kom peb tau txais kev khuv leej, kev zam, thiab kev pab ntawm lub theej kiab.

• Mas Kos Ntawv Moo Zoo (10,35-45)

35 Ntxes Npes Dais ob tug tub Yas Kos thiab Zam txav los ntawm Yes Xus, nug nws tias : “Xib Hwb, wb xav kom koj mloog wb thov koj”
36 Nws hais nkawd tias : "Neb xav kom kuv ua dab tsi rau neb ?"
37 Nkawd teb tias : "kom wb tau zaum ib tug ntawm koj sab xis, ib tug ntawm koj sab laug hauv koj lub hwj chim."
38 Yes Xus hais nkawd tias : "Neb tsis paub yam neb thov ntawd. Neb puas haus taus lub ntim kuv yuav haus, txais lub cim ntxuav yuav plos ntais kuv rau hauv ?”
39 Nkawd teb nws tias : “Wb ua tau kawg.” Nws teb tias : “Lub ntim kuv yuav haus, neb kuj yuav haus ; thiab lub cim ntxuav yuav plos ntais kuv, neb kuj yuav tau txais.
40 Qhov yuav zaum ntawm kuv sab xis los sab laug, tsis yog kuv tus yuav muab, nws muaj nws neeg nyob cov chaw npaj tseg no lawm.”
41 Lawv kaum leej hnov li ntawd, lawv chim rau Yas Kos thiab Zam nkawd.
42 Yes Xus hu lawv los hais rau lawv tias : "Nej twb paub : tej luag saib lawv ua tej teb chaws cov thawj neeg kav ua txiv ntxhias; cov loj tsis ntshai siv lawv hwj chim.
43 Ntawm nej, yuav tsum tsis txhob coj li ntawd. Leej twg xav ua tus loj, nws yuav ua nej tus tub txib.
44 Leej twg xav ua tus thawj, nws yuav ua sawv daws tus qhev.
45 Vim Neeg Leej Tub tsis tuaj kom luag tiam nws, tuaj kom tau tiam luag thiab muab nws txoj sia ntaus nqi txhiv zeej tsoom neeg."

(Mus nyeem tsab ntawv nthuav Ntawv Ntshiab)

LECTURES DE LA MESSE DU 18/10/2009
( Vingt-neuvième dimanche - année B )

(Hais lus Hmoob - En Français)

• 1ère lecture : Lecture du livre d'Isaïe (Is 53, 10-11)

Broyé par la souffrance, le Serviteur a plu au Seigneur. Mais, s'il fait de sa vie un sacrifice d'expiation, il verra sa descendance, il prolongera ses jours : par lui s'accomplira la volonté du Seigneur. A cause de ses souffrances, il verra la lumière, il sera comblé. Parce qu'il a connu la souffrance, le juste, mon serviteur, justifiera les multitudes, il se chargera de leurs péchés.

• 2ème lecture : Lecture de la lettre aux Hébreux (He 4, 14-16)

Frères, en Jésus, le Fils de Dieu, nous avons le grand prêtre par excellence, celui qui a pénétré au-delà des cieux ; tenons donc ferme l'affirmation de notre foi. En effet, le grand prêtre que nous avons n'est pas incapable, lui, de partager nos faiblesses ; en toutes choses, il a connu l'épreuve comme nous, et il n'a pas péché. Avançons-nous donc avec pleine assurance vers le Dieu tout-puissant qui fait grâce, pour obtenir miséricorde et recevoir, en temps voulu, la grâce de son secours. Evangile : Le Fils de l'homme est venu pour servir.

• Évangile de Jésus Christ selon saint Marc (Mc 10, 35-45)

Jacques et Jean, les fils de Zébédée, s'approchent de Jésus et lui disent : « Maître, nous voudrions que tu exauces notre demande. » Il leur dit : « Que voudriez-vous que je fasse pour vous ? » Ils lui répondirent : « Accorde-nous de siéger, l'un à ta droite et l'autre à ta gauche, dans ta gloire. » Jésus leur dit : « Vous ne savez pas ce que vous demandez. Pouvez-vous boire à la coupe que je vais boire, recevoir le baptême dans lequel je vais être plongé ? » Ils lui disaient : « Nous le pouvons. » Il répond : « La coupe que je vais boire, vous y boirez ; et le baptême dans lequel je vais être plongé, vous le recevrez. Quant à siéger à ma droite ou à ma gauche, il ne m'appartient pas de l'accorder, il y a ceux pour qui ces places sont préparées. » Les dix autres avaient entendu, et ils s'indignaient contre Jacques et Jean. Jésus les appelle et leur dit : « Vous le savez : ceux que l'on regarde comme chefs des nations païennes commandent en maîtres ; les grands leur font sentir leur pouvoir. Parmi vous, il ne doit pas en être ainsi. Celui qui veut devenir grand sera votre serviteur. Celui qui veut être le premier sera l'esclave de tous : car le Fils de l'homme n'est pas venu pour être servi, mais pour servir, et donner sa vie en rançon pour la multitude. »

Nruab Xyoo 29 Tim 18.10.2009

Ib tsoom niam txiv kwv tij neej tsa phooj ywg ua Tswv Ntuj cov tub ki mloog lus,

Rov txog hnub peb tuaj sib sau pe hawm peb Leej Txiv Tswv Ntuj ua nws tsaug thiab mloog nws Leej Tub, peb tus Huab Tais Yes Xus cov lus. Yog ib hnub zoo hnub zoo nyoog rau peb yog nws tub ki tuaj sib ntsib sib pom ntawm peb thaj chaw nyob, ntawm peb lub zos. Kuj yog ib lub zoo caij nyoog rau peb tuaj sib pab sib nres thov Leej Ntuj Plig lub zog pab yus tsev neeg, pab yus cuab kwv tij, yus ces neej tsa, yus lub zos thiab yus lub teb chaws kom sawv daws muaj kev nyob kaj siab. Pub kom sawv daws muaj siab ua neej hauv lub qab ntuj. Nyias muaj muaj nyias kev txob txhawj, kev ntxhov siab. Peb xav pab xav daws peb tej txheeb ze, tej phooj ywg tej txiab nkeeg, xav tsa lawv sawv kom zoo hlo ntawm lawv lub lav mob, los peb tsis muaj lub peev xwm ua tau. Yus tej niam txiv muaj lus chim siab. Yus cuab kwv tij thiab neej tsa muaj lus sib cav hais tsis sib haum…Yog ib hnub zoo caij zoo nyoog sawv daws yuav tuaj vam Peb Leej Txiv lo lus nplij, lo lus ntuas kho peb kom tug ntev rau tug, ib leeg zam rau ib leeg, ib tug hlub ib tug. Tswv Ntuj tib leeg thiaj yuav pab tau, cawm tau peb ntawm kev tsaus ntuj txhua yam. Yog li ntawd, peb tuaj vij tuaj ntsauv peb tus Huab Tais tsis nkim peb lub caij nyoog. Peb nkaum tom tsev, puag tes puag taw nyob, thiaj nkim caij nkim nyoog tsis muaj nuj nqes dab tsi ntxiv rau yus, tseem ua yus pluag txiaj pluag ntsim. Yog yus muab lub caij nyoog mus thov mus pe Luag ib los, Luag thiaj zoo siab muab txiaj ntsim pab yus, daws yus kev nyuaj siab.

Hnub no, peb hnov Yaj Saub His Xais hais txog Tswv Ntuj tshua tus tub txib raug mob raug ntshaj puas ntsoog. Hais txog saub, peb Hmoob puav leej paub, saub yog leej twg, saub txawj dab tsi. Saub thiaj pom yav tom ntej yuav tuaj, yuav tshwm sim zoo li cas. Yog yus nug, nws yuav pab yus qhia rau yus kom npaj yam ub yam no tos. Saub yuav pab yus daws yus kev nyuaj siab, kev txob txhawj. Hmoob thiaj hais kwv huam, yam twg xav paub ces mus nug saub, saub yuav hais, yuav qhia rau yus paub. Saub puj saub yawm yog tus qhuab qhia kev rau noob neej taug thaum noob neej kev tws. Feem coob, peb cov Hmoob paub saub yog paub mus zaj no, raws li Hmoob zaj, sawv daws ua kam hais kam hauv tej dab neeg thiab tej qhuab ke.

Sawv Saub raws li Tswv Ntuj txib, ua Tswv Ntuj ib tug Saub, nws txawv lawm ntau yus Hmoob zaj. Sawv Tswv Ntuj ib tug Saub, yog sawv Tswv Ntuj ib tug tub txib, ua Tswv Ntuj ib tug tub tshaj xo, hais lus taj Tswv Ntuj lub ncauj, sawv Tswv Ntuj lub npe, hais Tswv Ntuj lo lus rau leej tib neeg, qhia Tswv Ntuj lus rau lub sim ceeb tas txhia tsav puas yam ntuj tsim : tej pob zeb pob tsuas, nkauj hnub nraug hli, nroj tsuag, xyoob ntoo, kab ntsaum, tsiaj txhu, mi ntses khiav hauv dej, me noog ya saum ntuj…tas puas tsav yam txawm paub tus Tswv lus, tus tsim lawv tag nrho. Tus Tswv tsim lub sim ceeb thiab tsim neeg, yog Tswv Ntuj. Zoo li Tswv Ntuj tus Saub, leej ntshiab Antoine de Padoue. Thaum nws tuaj tshaj Yes Xus lub Moo Zoo txog Fab Kis, nyob Montpellier xyoo 1225. Sawv daws tau pom tej yam txawv txav nws tau txwv cov qav hauv ib lub pas dej ntsiag tas tsis quaj ib suab (le lac de saint Antoine)…Xyoo 1226, nws tuaj txog Bourges. Nws tau nrog ib tug yuam kev hauv txoj kev ntseeg (hérétique) sib cam. Tus neeg ntawd, tsis ntseeg lub cim yug, tsis ntseeg tias lub mov mog hauv thaj Txi Ntuj yuav yog tseem Yes Xus lub cev tau. Antoine de Padoue tau pab nws hloov nws lub siab. Muaj ib tug luj nyob ntawm nkawd yoo tshaib tau 3 hnub lawv tsis pub zaub. Kom neeg coj nplej tuaj pub tus luj noj. Tus luj yeem txhos caug pe lub Cim Yug tsis noj cov nplej lawv nqa tuaj. Thaum tus neeg pom li ntawd, nws thim xav tig los ntseeg lub Cim Yug yog tseem Huab Tais Yes Xus lub cev, nws tig los ua Kav Tos Liv. Thaum Antoine rov mus txog Italie teb. Nws caw cov neeg ntseeg yuam kev (les hérétiques) tuaj sib sau tom ntug hiav txwv nyob Rimini. Cov neeg tsis muaj leej twg quav ntsej cuab pob ntseg mloog nws tej lus qhia txog Yes Xus lub Moo Zoo. Antoine tig mus qhuab qhia ntses hauv hiav txwv. Muaj ib npoj ntses tuaj mloog nws cov lus qhia tim ntug dej. Tej lub cim no yog qhia rau peb tias, ua Tswv Ntuj tus Saub, yog qhuab qhia Tswv Ntuj lo lus rau lub sim ceeb kom lub sim ceeb tsis txhob yuam kev, tsis mus txhoj, tsis mus tsim kev lim hiam, siab pem. Qhuab qhia Tswv Ntuj lus pab kom lub sim ceeb nyob tiaj tus, noj qab nyob zoo. Kom huab cua zoo, tsis txhob kis mob kis ntsaj, ua pa tshuaj pa tshauv sawv lom nroj tsuag, tsiaj txhu thiab tib neeg. Cev Tswv Ntuj lus qhua qhia tib neeg kom sawv daws sib yoog sib zam, tseg kev ua plaub ua ntug, tsis txhob sib ntaus sib tua tuag tseg tub ntsoj ntxhais ntsuag, tsis muaj neeg hlub. Tseg poj ntsuam yawg ntsuag tsis muaj tug ntxiv nxhua. Ua Tswv Ntuj ib tug Saub, tsis yog hais Tswv Ntuj lus xwb. Yuav tau ua tag Tswv Ntuj tes qav num, txoj sib txoj hnyav yuav tau ua mus kom tiav, leg mus kom kawg. Yus yuav tau ris lub nra sib nra hnyav tag huv si. Tswv Ntuj tus Saub, yog tus tau txais lub Cim Ntxuav. Yog tus tau cog lus nrauj dab phem Xas Tas, tus haub tus ntxias neeg kom sib ncaim, kom yuam kev, ua neeg muab hlob khav theeb. Tag peb cov neeg tau txais lub Cim Ntxuav, Tswv Ntuj hu peb ua Saub tshaj Tswv Ntuj lo lus rau ntiaj teb neeg thiab rau lub sim ceeb. Tswv Ntuj tos ntshis tag sawv daws ua Saub, ua nws tub ntxhais txib tas tus. Hmoob hais tias khwv ciaj khwv tuag, ris lub nra hnyav, nce toj nqes taug, ntshaus hlaub ntshaus ceg, hmab dawm tes hlua dawm taw, pos khawb, nqaij ntuag ntshav nrog…Ua Tswv Ntuj tub ntxhais txib, yuav tau khwv tsis tau puag tes puag taw nyob ywj siab. Mus kev deb kev nkhaus, kev nce toj nqes hav yuav tau mus kom txog. Ntsib neeg pluag neeg txom nyem, yuav tau hais lus nplij, cev tes plws lawv. Pom cov neeg me raug tej neeg loj, neeg khav theeb tsuj thuam yuav tau pab tau cheem kom sawv daws sib haum, sib zam, sib hlub. Yus pom lo lus yuam kev siv tsis taus, pom txoj cai twg ua tsis raug, ua tsis ncaj, yus mus hais mus pab cov neeg me, ces yus raug luag ntxub, raug luag liam txhaum, raug tej nom tswv ntes mus nug, mus kaw nyob hauv nkuaj. Nyob tsev loj faj, luag muab yus yoo tshaib yoo nqhis, muab tsim txom, muab ntaus txha lov, nrim cev doog, ua nqaij nthuag ntshav nrog. Yus cia li ua neeg raug txim dawb dawb do do nrog tej neeg tub sab ua ib npoj, nrog tej tua neeg ua ib nkuag. Vim li ntawd, tus tub txib twg raug mob raug ntsaj puas ntsoog, Tswv Ntuj tshua thiab khuv leej nws. Tswv Ntuj tshua tus tub txib nquag raug mob raug ntsaj npaum li no. Tsis hnov Tswv Ntuj qhuas ib los txog tus tub txib nkees zaum puag tes puag taw, tsis paub ua ib los tsaug, tsis paub teev ib los ntuj. His Xais thiaj sawv Tswv Ntuj lus hais li no : Vim nws tau raug mob raug ntsaj, kuv tus tub txib, tus ncaj, nws yuav ua kom zeej tsoom ncaj ncees, nws yuav ua tus ris lawv cov txhaum.

Tswv Ntuj tus tub txib txawj ua zoo, txawj ua xis Tswv Ntuj siab nyiam yog Neeg Leej Tub. Peb mloog Huab Tais Yes Xus qhia neeg Leej Tub tes dej num thiab tus cwj pwm rau peb yoog. Peb thiaj li yuav txawj ua xis Tswv Ntuj siab nyiam. Muaj 3 yam zoo li no :

1-Muaj ntau zaus, thaum Hmoob los thov ua neeg ntseeg Tswv Ntuj. Lawv hais tias : « Vim peb pheej muaj muaj mob, mus ua neeb kho los tsis zoo. Ces peb yuav los thov lawb dab pov tseg…» Yog yus nrog lawv tham ntev ces pom tias, xyov lawv lub siab puas ntseeg Tswv Ntuj tiag. Lawv puas tso siab rau Tswv Ntuj, los zwm Tswv Ntuj yog lawv tus Huab Tais cawm lawv tiag.
Puas yog lawv ntshai dab, ces lawv los nkaum, los tsiv nraim kom dab txhob pom lawv. Vim dab ua lawv muaj muaj mob. Lawv xav tias los lawb dab ces yuav tau zoo tsis muaj mob ntxiv. Tiam sis lawb dab tas los tseem muaj mob li qub. Tej zaum mob tseem huam ces tseem mob loj dua qub. Kom Txiv Plig teev ntuj ces yuav thaiv tau lawv tus mob ib yam li ua neeb thaiv lawv thaum ub. Txiv Plig teev ntuj tas los tus neeg mob nws mob nws. Ces lawv haj yam xav tsis thoob. Lawv hais tias : Txiv Plig teev ntuj tsis leej. Txiv Plig tsis muaj hwj huam. Qhov no mas tsis luaj twg. Tiam sis qhov yuam kev loj, yog qhov lawv tsis tso siab rau Huab Tais Tswv Ntuj. Lawv poob siab, lawv thuam Tswv Ntuj hais tias teev ntuj tsis muaj nuj nqes, kho tsis tau lawv tus mob. Lawv xav tias Tswv Ntuj tsis paub lawv lub siab xav, tsis paub lawv zaj. Lawv yuav dag tau Tswv Ntuj ib yam lawv ua rau dab, dag yeej. Lawv nyiag kev rov mus thawj txiv neeb. Ces txiv neeb tias vim los lawb dab lawm, tub qaug plig poj plig yawm tshaib nqhis tsis muaj noj muaj haus ces yuav tau kho npaum no txiaj nyiag, kho lub taub hau tsiaj li no thiaj zoo nej lub mob. Cov Hmoob Kav Tos Liv coj li no, ntseeg tej yam no tseem muaj coob leej. Vim lawv tsis tau tsim kom meej, tsis xav txog tias : tib neeg teev dab los teev Tswv Ntuj tsis muaj tus txawj plhis tau li tus kab npauj los kab xi, los tus nab muab daim tawv laus pov tseg. Yus yuav tsum tsim los kom meej, paub kom tseeb tias : Mob plab dias hau, mob npaws, mob sida, mob canser…tsis tim dab ua txhob liam rau dab, tsis tim ntuj nplua, tsis yog khaum qhov twg ua rau neeg mob. Yuav kom zoo taub hau ces noj tshuaj. Tsis pub mob npaws ces vov vij tsam thaiv. Tsis xav mob sida, yuav tau tsim txiaj, ceev yus tus kheej kom zoo. Xav maim dhau canser, yuav tau caiv ncauj. Hmoob hais tias: txawj noj ces noj tau zoo nyob, tsis txawj noj ces noj ua mob.
Tsis yog yus los lawb dab lawm ces yus yuav tsis muaj mob. Tus xav li ntawd, yog ua npau suav lawm. Lawv xav yooj yim npaum li ntawd, ces thaum lawv pom nyuaj tuaj, ua rau lawv tsis muaj qhov tso siab rau Tswv Ntuj. Kuj tsis yog yus teev dab poj dab yawm li qub yus thiaj tsis muaj mob. Txhob coj li ib txhia neeg muab kev teev dab thiab teev Tswv Ntuj los txuam kab mob kev nkeeg. Peb yog neeg hwm Tswv Ntuj teev Tswv Ntuj, tsis txhob muab kev teev Tswv Ntuj los txuam kev muaj mob dia hau. Peb muab Tswv Ntuj ua tshuaj kho tsis tau peb qhov mob qhov ntsaj kom zoo. Ua li, peb Ntseeg Tswv Ntuj muaj nuj nqes dab tsi ? Yog vim peb muaj muaj mob, peb thiaj thov Tswv Ntuj lub txiaj ntsim tuaj roos pej, txuag peb, tiv thaiv peb. Peb ntxub ntxub dab lawm, thov Tswv Ntuj lub txiaj ntsim caum dab, lawv dab khiav kom deb ntawm peb lub neej thiab txoj xub ke. Peb ntseeg Tswv Ntuj, tsis yog kom peb lub cev nqaij tau zoo nyob xwb. Yog peb pom Tswv Ntuj muaj nqes rau peb lub cev muaj mob xwb, peb los ntseeg Tswv Ntuj, peb yuav plam ntxhiab (déçu) ntau yam rau Tswv Ntuj. Vim peb hais Tswv Ntuj tsis mloog, peb hais tsis tau Tswv Ntuj ua peb tus qhev li peb siab nyiam. Yus yuav tau nug yus kom txaus txaus : Peb los ntseeg Tswv Ntuj yog vim li cas ? Vim peb nyiam Tswv Ntuj ua peb tus Huab tais, ua peb Niam peb Txiv hlub peb. Peb yuav hwm Tswv Ntuj loj tshaj puas tsav yam. Peb yuav tsum hais tau rau Tswv Ntuj : Huab Tais, kuv yog koj me tub me nyuam, thov koj txuag kuv, pab kuv, daws kuv kev nyuaj siab, kho kuv lub mob lub ntsaj. Koj pub kuv ciaj kuv zoo siab ciaj ua neej nyob, koj pom zoo kuv tuag kuv zoo siab tuag. Koj yog kuv Niam kuv Txiv, yog kuv tus Huab Tais. Koj thiaj yog tus Tswv kav cov neeg ciaj, saib cov neeg tuag. Thov koj txais kuv tus ntsuj plig ze ntawm koj xub ntiag ; pub kuv nrog koj muaj txoj sia nyob mus li. Peb los ntseeg Tswv Ntuj, peb yuav tso siab tag nrho rau Tswv Ntuj, peb thiaj tsis yuam kev. Thaum ntawd, Tswv Ntuj tsis yog tus huab tais zoo tshuaj lawm xwb. Tswv Ntuj yog tus yuav pab yus, tus yuav tso tau yus tus ntsuj plig dim ntawm dab txhais xib teg los mus ciaj sia nyob txhiab niag tim puas xyoo ntawm Tswv Ntuj.

2-Yus los ntseeg Tswv Ntuj raws li lub Koom Txoos Kav Tos Liv qhia, yog mloog Huab Tais Yes Xus qhia. Yus yuav tsum hloov siab hloov ntsws kom tag dua tshiab. Yus yuav tsum hloov yus lub neej dua tshiab. Tso tag yus lub qub siab pov tseg. Tso tag yus lub qub neej pov tseg. Txij hnub yus txais lub Cim Ntxuav, yog hnub yus rov yug dua tshiab lawm. Yus pib lub neej tshiab raws li Yes Xus cov lus qhia ua mus, tsis yog ua li yus lub siab nyiam. Yog xyaum coj thiab qhib pob ntseg mloog Yes Xus lus qhia, ua raws li Yes Xus nyiam kom yus ua. Niaj hnub nco ntsoov muab yus lub neej cog rau Yes Xus txhais xib teg. Zoo li tus me nyuam mos xyaum hais lus, yus yuav xyaum kawm xyaum hais Yes Xus cov lus. Yus yog neeg siab luv, yog neeg dag kam, neeg nkees. Yus yuav tau xyaum ua neeg siab ntev, ua siab loj zam rau luag. Tus neeg ua tub qaug yus, yuav tau cheem yus lub siab kom ntev, tsis txhob npau, tsis txhob ua pauj luag…Yus xyaum ua neeg nquag, tsis ntshai siv zog pab yus tsev neeg, pab luag tej, hlub tej neeg pluag neeg txom nyem. Yus ib txwm yog neeg khav theeb, neeg muab hlob. Yus yuav xyaum hais lus mos, hais lus saib taus luag tej. Ntsia yus pog yus yawg, ntsia yus niam yus txiv, ntsia cov neeg laus, ntsia cov neeg siab ncaj, kawm lawv tej lus hais, yoog lawv coj lawv tus yam ntxwv. Tsis txhob ua neeg loj, txhob ua neeg khav theeb muab hlob li qub. Peb pom tias ua neeg hwm Tswv Ntuj tsis yooj yim, yuav tau ua neeg nquag, yuav tau siv zog tas lub neej. Hauj lwm ua tsis tag li. Txhob xav tias yus ua neeg teev Tswv Ntuj, ntseeg Tswv Ntuj lawm, twb ntxuav plig tas thaum ntxov ces tag tsis tshuav tsis muaj hauj lwm ua ntxiv. Yes Xus tej nyuag lus qhuab qhia, yus twb hnov txhij hnov txhua, paub tas lawm, paub txaus txaus lawm. Tej zaum tseem paub zog leej puav Xib Hwb thiab Txiv Plig lawv lawm thiab. Yus rov pom yus muaj muaj nuj nqes thiab zoo txaus txaus li lawm, tsis muaj chaw xyeej qhov twg. Yus puas muaj peev xwm khav tau tias yus txawj ua tas puas tsav yam xis Tswv Ntuj siab lawd ?
Peb mloog Yas Kos thiab Zam nkawd ob kwv tij saib Yes Xus qhia li cas rau nkawd ? Xub xub thov Yes Xus, kom xub tau Yes Xus lub hwj chim. Cov thov tom qab, ces tau hwj chim yau zog. Nkawd xav tau li ntawd : « kom wb tau zaum ib tug ntawm koj sab xis, ib tug ntawm koj sab laug hauv koj lub hwj chim. » Nyob hauv ib pluag noj, ntawm rooj tsoob rooj kos, los puas nom tswv caw mus noj ib tsum mov, los huab tais vaj ntxwv caw mus noj mov. Cov neeg tseem ceeb yog cov nyob ze vaj ntxwv sab xis thiab sab laug, los nom tswv sab xis thiab sab laug. Nyob hauv Hmoob rooj tshoob, yog txiv tuam mej koob lwm mej koob yog cov tseem ceeb. Lawv yog cov zaum ntawm lub rooj tshoob. Cov sawv ncig lub rooj tshoob yog cov tuaj mloog, tuaj koom thiab tuaj noj tshoob noj kos xwb.
Yas Kos thiab Zam nkawd muaj ntsej muag nug Xib Hwb Yes Xus kom pub nkawm ob kwv tij tug zaum sab xis tug zaum sab laug puab Yes Xus. Zoo li nkawd tsis ntshai tub qaug lwm cov thwj tim. Thaum lawv hnov nkawd nug Yes Xus li ntawd, kuj khib lawv, cuag li nkawd saib tsis taus lawv. Ces cov thwj tim tau sib cav ob peb los. Vim cov thwj tim tseem ntshaw tus twg los xav ua tus loj, ua tus thawj. Lawv thiaj li muaj lus sib cam…Niaj hnub no, peb tsis txhob xav tias peb tsis muaj kev sib khib rau peb hauv yus tsev neeg, ntawm yus cuab kwv tij los ntawm yus tej neej tsa. Sawv daws yeej muaj lus sib khib, sib cav sib ceg, sib chim, tug chim rau tug, tsis xav sib hais lus ua ke, tsis sib xauj sib xyuas…Peb yuav sib kho li cas thiaj rov sib zoo siab ? Puas muaj kev rau sawv daws sib kho kom rov los sib haum ? Peb yuav ntsia saib Yes Xus hais dab tsi rau cov thwj tim kom rov los sib haum.
“Leej twg xav ua tus loj, nws yuav ua nej tus tub txib. Leej twg xav ua tus thawj, nws yuav ua sawv daws tus qhev. Vim Neeg Leej Tub tsis tuaj kom luag tiam nws, tuaj kom tau tiam luag thiab muab nws txoj sia ntaus nqi txhiv zeej tsoom neeg.” Yog peb tsis hloov siab tshiab, yog peb tsis tab lub neej tshiab ua, peb tsis coj peb lub neej kom dhos li Yes Xus cov lus qhia. Nyias yuav ua li nyias lub qub neej tsis mloog Yes Xus lus qhia, ces peb yeej tsis muaj kev los sib haum tau. Ib leeg yeej tsis zam rau ib leeg. Peb lub ncauj lam lees ua Tswv Ntuj me nyuam, peb lub siab tseem coj qub kev cai, ua lub neej qub, ua zaj qub. Peb lub neej pauv tsis ntxiv cov neeg tsis hwm ntuj tsis paub ntuj. Tej zaum, tej neeg coj dab qhuas tseem siab ncaj, siab zoo dua yus tus neeg ntseeg, yus tus neeg hwm Tswv Ntuj…

3-Ib tsoom niam txiv kwv tij neej tsa phooj ywg mloog Tswv Ntuj lus ua Tswv Ntuj tub ki. Peb mloog Huab Tais Yes Xus cov lus qhuab qhia ua Tswv Ntuj Saub, ua Tswv Ntuj tub ntxhais txib. Peb ua Yes Xus thwj tim niaj hnub no rau yus tsev neeg, yus cuab kwv tij, yus tej neej tsa thiab txheeb ze. Peb yog sawv daws tus tub txib, ua sawv daws qhev. Peb zoo siab hlo ua peb txoj hauj lwm kom tom thawj. Ua lub siab loj nteev, siv zog ntsos, nquag ua yus tes dej num kom zoo. Yus ua yus tsev neeg qhev, hlub yus tej poj niam tub se. Hlub tej laus, tu tej laus, tuav lawv tes mus kev, ncig qab vag tsib taug kom hnub thiab hmo tsis txhob ntev ntev rau lawv. Peb nyias yuav tuav nyias txoj hauj lwm tsis txhob qaug zog, txhob txhawj, txhob ntshai. Tus neeg nyob tsev loj faj tsis muaj neeg hlub, tsis muaj neeg nyiam. Yus yuav tau hlub, yus yuav tau nyiam tej neeg tsis zoo hlub tsis zoo nyiam. Leej tib neeg twg twb ntxub, twb dhuav, tsis xav ntsib, tsis xav pom yus tus yeeb ncuab. Yus yuav tau thov Leej Ntuj Plig lub zog pab yus kom yus muaj cuab kav ntsib tau yus tus yeeb ncuab. Yog hnub twg Leej Ntuj Plig pab peb leej twg muaj lub zog ua tau tej yam ntiaj teb tib neeg ua tsis tau. Hnub ntawd, yog hnub peb nrog Neeg Leej Tub zaum ntawm nws sab xis los sab laug txhiv zeej tsoom neeg ntawm kev yooj yim, dua rhe zeej tsoom neeg ntawm peb kev sib ntxub los sib hlub ua Leej Txiv Tswv Ntuj tub ki.

Niaj hnub, peb yuav siv zog ntsos tab peb lub neej ua hauv Huab Tais Yes Xus txhais xib teg. Thov kom Leej Ntuj Plig lub zog txhawb nraim sawv daws tej siab ntsws.

Cwj Vuam Chiv 11.10.2009

COV ZAJ NYEEM RAU HNUB CHIV 11/10/2009
( Hnub chiv 28- xyoo B )

(Hais lus Hmoob - En Français)

• Zaj nyeem 1 : Tsab Ntawv Thoob Tsib (7,7-11)

7 Kuv tau thov, ces kev txawj ntse muaj tuaj rau kuv. Kuv tau pe, ces lub tswv yim thoob tsib tuaj nyob saum kuv.
8 Kuv nyiam nws tshaj tej cwj vag thiab tej theej kiab. Rau kuv, kev nplua nuj tsis muaj nuj nqes ib qho piv rau nws.
9 Kuv tsis yeem muab nws piv rau tej paj zeb paj tsua. Tas lub ntiaj teb thooj kub ntawm nws ib sab tsuas yog nyuag suab puam, nyiaj tsuas yog av nkos xwb.
10 Kuv nyiam nws heev tshaj kev xis nyob thiab kev zoo nkauj zoo nraug. Kuv yeem xaiv nws dua qhov pom kev, vim nws nyob ci lam lug tsis qauj.
11 Tas puas tsav yam zoo nrog nws tuaj rau kuv thiab nws tes nplua nuj suav tsis paub txheeb.

• Zaj nyeem 2 : Hes Nplaws (4, 12-13)

12 Tswv Ntuj lo lus muaj txoj sia. Tswv Ntuj lo lus ua tau hauj lwm. Tswv Ntuj lo lus ntse dua ib rab ntaj ob sab hniav. Nws txeem mus tau hauv tus plig thiab hauv nruab nrab lub tswv yim. Nws mus tau rau hauv cov pob qij txha thiab cov paj hlwb. Tswv Ntuj lo lus txawj txiav txim rau lub siab ntshaw, thiab rau tej zaj tswv yim nyob hauv nruab siab.
13 Tas puas tsav yam Ntuj tsim los, mas yeej tsis muaj ib yam uas Tswv Ntuj lo lus pom tsis tau. Txhua yam nqha nrig thiab du lug nyob ntawm Tswv Ntuj xub ntiag. Peb yuav tsum cev peb tej hauj lwm huv tib si rau nws pom.

• Mas Kos Ntawv Moo Zoo (10,17-30)

17 Yes Xus tab tom sawv kev, muaj ib tug neeg khiav tuaj txog ntawm nws, txhos caug ntua nug tias : "Xib Hwb siab zoo, kuv yuav ua li cas thiaj tau txais lub cuab tam txoj sia nyob mus li ?"
18 Yes Xus hais nws tias : "Vim li cas koj hu tias kuv siab zoo ? Tsis muaj tug siab zoo, tsuas kawg Tswv Ntuj tib leeg kheej.
19 Koj paub cov lus qhuab qhia : txhob tua neeg, txhob deev luag txij nkawm, txhob ua tub sab, txhob liam txhaum rau luag, txhob ua tub qaug luag, hwm koj niam koj txiv."
20 Tus neeg ntawd teb tias : "Xib Hwb, txij puag thaum tseem hluas, kuv saib ntsoov cov lus qhuab qhia no."
21 Ntsia ntsoov tus ntawd, Yes Xus cia li nyiam nws thiab hais nws tias : "Tshuav tib qho koj tsis muaj : rov mus, muag tas puas tsav yam koj muaj, muab pub rau tej pluag, koj yuav muaj ib lub cuab tam nyob saum ntuj ; rov tuaj thiab tuaj caum kuv."
22 Tiam sis tus ntawd, hnov cov lus no, cia li dub txig, chim siab nrho rov mus, vim nws muaj cuab yeej cuab tam ntau.
23 Yes Xus tsa muag xam ncig lees thiab hais rau nws cov thwj tim tias : "Xyov ua cas cov rau neeg nplua nuj mus hauv Tswv Ntuj lub Tsheej !"
24 Cov lus no ua rau cov thwj tim xav tsis thoob. Tab sis Yes Xus rov hais ntxiv : "Kuv cov me nyuam, mus hauv Tswv Ntuj lub Tsheej xyov yuav ua cas cov !
25 Tseem yooj yim tshaj rau tus ntxhuav chaws lub qhov koob dua tus nplua nuj nkag mus hauv Tswv Ntuj lub Tsheej."
26 Cov thwj tim yim huab xav tsis thoob. Lawv sib hais zom zaws : "Leej twg thiaj yuav tau kev dim ?
27 Yes Xus ntsia ntsoov lawv thiab teb tias : "Zaj twg kev puav leej tws rau tib neeg, tsis rau Tswv Ntuj; vim dab tsi twb tau tag nrho rau Tswv Ntuj."
28 Pob Zeb hais rau Yes Xus tias : “Peb twb tso tas puas tsav yam tseg tuaj raws koj.”
29 Yes Xus hais tias : "Kuv hais tseeb rau nej, leej twg tau tso vaj tse, kwv tij, muam, niam thiab txiv, me tub me nyuam, thiab liaj teb tseg vim kuv thiab vim lub Moo Zoo,
30 tsis muaj nws yuav tsis txais ib puas npaug hauv sim neej no : vaj tse, kwv tij, muam, niam, me tub me nyuam, liaj teb, ntxiv kev raug hiam thiab lwm tiam, txoj sia nyob mus li.

(Mus nyeem tsab ntawv nthuav Ntawv Ntshiab)

LECTURES DE LA MESSE DU 11/10/2009
( Vingt-huitième dimanche - année B )

(Hais lus Hmoob - En Français)

• 1ère lecture : Lecture du livre de la Sagesse (Sg 7, 7-11)

J'ai prié, et l'intelligence m'a été donnée. J'ai supplié, et l'esprit de la Sagesse est venu en moi. Je l'ai préférée aux trônes et aux sceptres ; à côté d'elle, j'ai tenu pour rien la richesse ; je ne l'ai pas mise en comparaison avec les pierres précieuses ; tout l'or du monde auprès d'elle n'est qu'un peu de sable, et, en face d'elle, l'argent sera regardé comme de la boue. Je l'ai aimée plus que la santé et que la beauté ; je l'ai choisie de préférence à la lumière, parce que sa clarté ne s'éteint pas. Tous les biens me sont venus avec elle, et par ses mains une richesse incalculable.

• 2ème lecture : Lecture de la lettre aux Hébreux (He 4, 12-13)

Elle est vivante, la parole de Dieu, énergique et plus coupante qu'une épée à deux tranchants ; elle pénètre au plus profond de l'âme, jusqu'aux jointures et jusqu'aux moelles ; elle juge des intentions et des pensées du coeur. Pas une créature n'échappe à ses yeux, tout est nu devant elle, dominé par son regard ; nous aurons à lui rendre des comptes.

• Evangile : Evangile de Jésus Christ selon saint Marc (Mc 10, 17-30)

Jésus se mettait en route quand un homme accourut vers lui, se mit à genoux et lui demanda : « Bon maître, que dois-je faire pour avoir en héritage la vie éternelle ? » Jésus lui dit : « Pourquoi m'appelles-tu bon ? Personne n'est bon, sinon Dieu seul. Tu connais les commandements : Ne commets pas de meurtre, ne commets pas d'adultère, ne commets pas de vol, ne porte pas de faux témoignage, ne fais de tort à personne, honore ton père et ta mère. » L'homme répondit : « Maître, j'ai observé tous ces commandements depuis ma jeunesse. » Posant alors son regard sur lui, Jésus se mit à l'aimer. Il lui dit : « Une seule chose te manque : va, vends tout ce que tu as, donne-le aux pauvres et tu auras un trésor au ciel ; puis viens et suis-moi. » Mais lui, à ces mots, devint sombre et s'en alla tout triste, car il avait de grands biens. Alors Jésus regarde tout autour de lui et dit à ses disciples : « Comme il sera difficile à ceux qui possèdent des richesses d'entrer dans le royaume de Dieu ! » Les disciples étaient stupéfaits de ces paroles. Mais Jésus reprend : « Mes enfants, comme il est difficile d'entrer dans le royaume de Dieu. Il est plus facile à un chameau de passer par le trou d'une aiguille qu'à un riche d'entrer dans le royaume de Dieu. » De plus en plus déconcertés, les disciples se demandaient entre eux : « Mais alors, qui peut être sauvé ? » Jésus les regarde et répond : « Pour les hommes, cela est impossible, mais pas pour Dieu ; car tout est possible à Dieu. » Pierre se mit à dire à Jésus : « Voilà que nous avons tout quitté pour te suivre. » Jésus déclara : « Amen, je vous le dis : personne n'aura quitté, à cause de moi et de l'Évangile, une maison, des frères, des soeurs, une mère, un père, des enfants ou une terre, sans qu'il reçoive, en ce temps déjà, le centuple : maisons, frères, soeurs, mères, enfants et terres, avec des persécutions, et, dans le monde à venir, la vie éternelle.

Nruab Xyoo 28 Tim 11.10.2009

Ib tsoom niam txiv kwv tij neej tsa phooj ywg sawv daws,

Peb zoo siab rov tuaj sib sau ua ke mloog Tswv Ntuj lus qhuab qhia. Xyov peb puas tseem nco cov lus Tswv Ntuj tau hais rau peb hnov lub lis piam dhau tas los no : hais txog kev ua txij ua nkawm ruaj nreb khov kho dawb paug ntawm Tswv Ntuj xub ntiag. Vim thaum chim lub keeb, Tswv Ntuj tau tsim muaj poj niam thiab txiv neej los nyob ua ke. Hmoob hais tias : “ ua cav lwj sis ib nyob”. Yog txoj kab txoj ke Tswv Ntuj tsim muaj cia kom tib neeg tsis txhob muab sib cais.

Lis piam no, peb yuav khaws ob lub ntsiab lus ua txhiam xws yug peb txoj sia, txhawb peb kev tso siab rau Tswv Ntuj. Ua lub neej hauv qab ntuj khwb, tib neeg yuav tau khwv thiaj li yuav muaj noj muaj hnav, muaj nyiaj thiab muaj txiaj. Tsis hais haiv neeg twg, lub teb chaws dab tsi, ua neej nyob sawv daws yeej ua lub neej taug tib txoj kab mus tib txoj ke. Tus tib neeg twg yeej xav muaj xwb tsis xav pluag. Tas txhua tus puav leej ntshaw nplua nuj. Qhov no ua rau sawv daws sib tw ua neej kom muaj noj tsis tshaib, haus tsis nqhis, hnav tsis tag…Thaum nyias lub siab ntshaw qhuab qhia nyias kom siv zog ntsos rau nyias lub luag dej luag num, yog kev tsa neeg lub neej kom tsheej, yog ib qho zoo. Nyias yuav tau khwv tiag los yug nyias poj niam tub se, tsa nyias lub cuab lub yig, kom ua neej xws luag, muaj lub vaj lub tse nyob xws teb xws chaw tsis yog phem.

Yam tsis zoo ntawm kev nplua nuj, yog thaum kev nplua nuj txia ua dab ua xyw auv tib neeg tej siab ntsws. Thaum Hmoob tseem ua dab ua qhua, dab thiab xyw auv ua mob ua ntsaj rau Hmoob tsuas ploj tuag leej puav xwb. Thaum kev nplua nuj txia ua dab tshoj ua xyw auv ntiaj teb tib neeg mob ploj tuag txog zej txog zos thoob teb thoob chaw thoob ntiaj teb. Nyob hauv cov teb chaws nruab nrog av txawm qhov nyiaj qhov kub, txawm qhov roj av…yog cov teb chaws muaj tsov muaj rog, muaj tub sab, neeg sib ntxub, sib ntaus sib tua tuag sis tsub sis nias, tsis khuv leej khuv xim tib neeg txoj sia. Vim neeg sib txeeb kev nplua nuj. Tog twg los xav txeeb kom tau kav cov qhov nyiaj qhov kub qhov roj. Tog twg zog loj, muaj riam phom zoo tuav khov kho tej ntawd nyob hauv lawv tes. Tog twg zog me zog tab, yeej tiv qawv ua hnub ua hmo caws hoob pob tawg ua lwj ua liam. Peb tsis txhob xav tias kev nplua nuj tsis ua dab tshoj tau yus, tsis ua xyw auv yus qaug, tsuas tshoj thiab auv luag tej xwb. Dab nplua nuj rhuav tau yus lub neej piam sij pov tseg. Yus ob niam txiv siv siv zog mus khwv ib xyoos ntuj zeeg tseg tau me ntsis nyiaj hauv qab nas. Tos tsis hnyoo ntuj tshiab tawm, yuav mus xyuas kwv xyuas tij lawm ntuj qub qab. Sau zog nyiaj qab nas taug kev lawm du lug twb tsis kum yees, tseem mus luab nuj luab nqi cia, ua ntaub ntawv tseg cog lus rau luag, mus tsis tuag mam rov los ua zog them nuj them nqe. Yog tuag lawm, mam rov los txia ua nyuj ua nees rau luag laij rau luag thauj. Lub caij ntawd, poj niam tub se nyob hauv tsev, muaj mob dia hau tsis muaj tug txhawj. Lawv yuav nyiam yoo tshaib yoo nqhis tom qab kav liam lawv. Tsuav yus dim plaws mus lwj mus tsw ntsej tsis hnov muag tsis pom yus pab niam tub kev txom nyem. Phau Ntawv Thoob Tsib thiaj qhia tias : “Tas lub ntiaj teb thooj kub piv rau kev thoob tsib tsuas yog nyuag suab puam, nyiaj tsuas yog av nkos xwb.”Vim kev nplua nuj txw neeg sib ntxub, sib khib, sib ntaus sib tua. Cov neeg tsis thoob tsib, muaj me me nyiaj, me me kub txawm ua neeg muab hlob khav theeb, hais lus loj loj, muaj muaj ntsej muag tsis ntshai tub qaug leeg twg. Yog li ntawd, muaj tag lub ntiaj teb thooj kub piv tsis tau muaj kev thoob tsib.

Vim kev thoob tsib tsim kev phooj kev ywg, kev sib haum xeeb. Tib neeg nyob tau ua ke, nws coj neeg los ua pab ua pawg, txhawb txhim neeg lub neej ib tug txawj vam txog tug, qhia neeg sib hlub sib pab. Kev thoob tsib tsis yog ib zag zoo tswv yim los ib zag zoo txuj, yus yuav kawm kom yus muaj kev thoob tsib li kawm txuj kawm ci, kawm kev txawj ntse xwb. Yam rab riam rab txuas yuav hov thiaj ntse, tsis hov tsis ntse, tsis yog li ntawd. Nyob hauv peb txoj kev ntseeg Tswv Ntuj, kev thoob tsib muaj nuj nqes dua txuj ci thiab kev txawj ntse. Kev thoob tsib muaj ib lub pliaj plhu yus yuav tsum pom thiaj paub neeg, yog ib leeg twg yus yuav tsum mloog nws hais raws kom cuag nws tus roj tus hneev: “Kuv yeem xaiv kev thoob tsib dua qhov pom kev, vim nws nyob ci lam lug tsis qauj. Tas puas tsav yam zoo nrog nws tuaj rau kuv thiab nws tes nplua nuj suav tsis paub txheeb.” Kev thoob tsib lub pliaj plhu yog peb tus Huab Tais Yes Xus. Tus yuav pab tau peb, txawj qhuab qhia kom peb thoob tsib, yog Huab Tais Yes Xus tib leeg xwb.

Peb qhib ntsej mloog Yes Xus qhia rau tus neeg tuaj pe nws thov kom nws pab. Peb pom ntawm txoj cai, tus neeg ntawd yog neeg zoo neeg ncaj. Ib txwm, nws tsis tau ua phem, tsis tau ua tub qaug leej twg. Nws khaws tej lus qhuab qhia rau nruab siab, ua raws li txoj cai sau tseg, tsis ua txhaum leej twg. Ntawm kev ua neej, nws yog ib tug neeg nquag, ib tug neeg nplua nuj, muaj cuab yeej cuab tam ntau. Tiam sis ntawm kev hwm Tswv Ntuj, nws xav tau hauv nruab siab, nws paub nws tseem ua tsis tau pov khawv, tsis ti txha, nws tseem xav ua zoo dua ntxiv. Nws hnov luag tej cav Xib Hwb Yes Xus lub moo nrov ncha ntws. Nws txhob txwm tuaj ntsib Xib Hwb Yes Xus nrog Yes Xus tham : "Xib Hwb siab zoo, kuv yuav ua li cas thiaj tau txais lub cuab tam txoj sia nyob mus li ?" Yes Xus pom tias tus neeg ntawd, siab ncaj siab zoo. Yes Xus hlub nws kawg, xav pab nws kom nws muaj lub cuab tam txoj sia nyob mus li raws li nws lub siab ntshaw. Los xyov ua cas thaum Yes Xus qhia kev rau nws taug, nws tseem cia li yig thim dub muag txig rov qab lawm. Yes Xus khuv xim nws kawg nkaus : "Xyov ua cas cov rau neeg nplua nuj mus hauv Tswv Ntuj lub Tsheej !"

Ib tsoom niam txiv kwv tij neej tsa phooj ywg, peb kuj yuav tau muab xav rau ntawd peb tib yam thiab. Zim txwv no peb los ua neeg ntseeg Tswv Ntuj lawm. Ntawm txoj cai, peb puas ncaj tshaj tus neeg tuaj pe tuaj thov Yes Xus pab nws no ? Tej zaum peb tsis tua neeg, tsis deev luag txij nkawm, tsis ua tub sab, tsis liam txhaum rau luag, tsis ua tub qaug luag, yus hwm yus niam yus txiv. Yus ntsia yus dawb huv lawm tiag, tsis phim Huab Tais Tswv Ntuj yuav xyeej yus. Nej puas tau ceev faj, mloog peb cov neeg ntseeg tham ntau zaus. Nej puas tau hnov tej txhia lawv hais tias : “ Cov nquag mus teev ntuj tseem yog cov muaj txhaum loj. Yus nyob tom tsev, yus tsis tau ua tub qaug leej twg. Yus tseem ncaj tshaj cov niaj hnub mus teev ntuj…Tsis tas li ntawd xwb, yus teev yus ntuj tom tsev Tswv Ntuj kuj mloog tib yam…” Cov neeg xav li ntawd, lawv tsuas pom li lawv zaj xwb. Tshuav luag zaj lawv tsis pom tsis paub. Tshuav Tswv Ntuj zaj, Tswv Ntuj xav li cas, lawv puas paub ? Tsis tas li ntawd, tej zaum tim yus tub nkeeg, ua neeg nkees tsis xav teev ntuj, ces yus hais yus zaj lwv luag zaj kom yus tau nyob, kom luag tsis txhob ntsia yus tav toj, txhob hais tau yus, txhob thuam yus neeg nkees…Thiab cov neeg nkees teev ntuj tsuas pom lawv zaj yuam kev rhuav xwb. Lawv pheej xav tias lawv zoo txaus lawm, tsis vam txog Tswv Ntuj tej txiaj ntsim pab lawv ntxiv. Los puas mus teev ntuj, yog mus nkim caij nkim nyoog, teev tsis tau dab tsi. Hauj lwm nceev nrooj hauv vaj hauv tsev ua tsis tag. Yuav tos cia khoom khoom lwm hnub mam mus.
Yog Yes Xus muaj lus qhia rau tus neeg tuaj ntsib nws. Yes Xus kuj muaj lus qhia rau yus niaj hnub no tib yam hauv peb txoj kev ua neej, hauv peb txoj kev hwm Tswv Ntuj, ntseeg Tswv Ntuj. Xyov peb puas txawj nyiam Tswv Ntuj, peb puas muaj zog nyiam tej neeg tsis zoo nyiam raws li Yes Xus qhia rau peb ua. Peb yuav tau ceev faj kom zoo. Tus neeg nplua nuj ntsia nws tus kheej yog neeg zoo neeg ncaj lawm. Tab peb xav tias peb yog neeg zoo neeg ncaj. Peb yuav tsis ncaj tsis zoo tshaj tus neeg ntawd thiab. Thaum kawg, tus neeg ntawd thim dub muag txig rov qab lawm. Yes Xus hlub tus neeg ntawd kawg, xav pab kom nws muaj lub cuab tam txoj sia nyob mus li. Los thaum kawg, nws cia li tuaj yeem tso Tswv Ntuj tej koob hmoov pov tseg, tsis mloog Yes Xus hais, yeem rov qab mus ris nws txoj kev nyuaj siab li qub, khee nws tej cuab yeej cuab tam nyiaj thiab kub yog suab puam thiab av nkos los txhim kho nws tej phab ntsa tsev, xov nws lub laj kab, xov nws lub loog, ib hnub twg, nws yuav tso tseg twj ywm cia nqa tsis tau nrog nws ua ke. Thaum yus los, yus yeej los tes dawb tes npliag. Thaum yus rov, yus yeej rov liab qab ploog. Tsuas yog Tswv Ntuj tej koob hmoov yus thiaj li yuav muaj khaws tseg, thiab txoj sia nyob mus li yus thiaj li yuav nrog Tswv Ntuj muaj.

Cwj Vuam Chiv 8.10.2009

COV ZAJ NYEEM RAU HNUB CHIV 04/10/2009
( Hnub chiv 27- xyoo B )

(Hais lus Hmoob - En Français)

• Zaj nyeem 1 : Cov lus nyob hauv ntawv Hauv Paus (Gn 2, 18-24)

18 Thaum chiv lub keeb, Huab Tais Tswv Ntuj tsim lub ntuj lub teb, nws hais tias : "Tsis zoo cia txiv neej nyob ib leeg kheej. Kuv yuav ua ib tug pab nws kom phim nws."
19 Huab Tais Tswv Ntuj muab av los puab tas tej tsiaj nkag pem teb thiab tej noog ya saum ntuj. Nws coj lawv los rau tus txiv neej saib nws yuav tis lawv npe li cas. Lawv puav leej muaj sia, tus txiv neej thiaj muab lawv ib leeg ib lub npe.
20 Tus txiv neej muab npe tas rau tej tsiaj txhu, rau cov noog ya saum ntuj thiab rau tas tej tsiaj nkag pem teb. Tiam sis nws tsis ntsib ib tug pab tau nws thiab phim nws.
21 Huab Tais Tswv Ntuj tso ib tug dab ntub txawv txawv laum tus txiv neej, ces nws txawm looj lawm. Huab Tais Tswv Ntuj rho ib qho nqaij ntawm nws tav thiab rov muab foob rau.
22 Yam nws tau rho ntawm tus txiv neej los, nws txawm muab puab ua ib tug poj niam thiab coj los rau tus txiv neej.
23 Tus txiv neej hais tias : "Zaum no, nqaij yog kuv nqaij, txha yog kuv txha ! luag yuav hu nws ua : “Poj niam”.
24 Yog vim li ntawd, tus txiv neej yuav tso nws niam nws txiv tseg, nws yuav mus npuab nws tus poj niam, nkawd ob leeg yuav los ua ib ke.

• Zaj nyeem 2 : Hes Nplaws (He 2, 9-11)

9 Yes Xus tau txo nws qis dua cov Tshiab ib me ntu, ces peb pom nws tau lub hwj chim thiab lub koob meej roos nws, vim nws tau txais txoj kev tuag. Nws yuav tsum saj txoj kev tuag, nws thiaj pab tau txhua tus neeg. Tswv Ntuj lub txiaj ntsim mus li ntawd.
10 Vim tias, tus tsim tas puas tsav yam los kom puas tsav yam ntawd tsob hwb nws, mas nws xav coj neeg tej tub ki coob coob mus txais koob meej thiab txais kev cawm. Phim nws yuav cia tus Ntaus Thawj raug txom nyem kom nws ntshiab tuaj.
11 Vim tus ua tau kom luag ntshiab, thiab cov txais kev ntshiab, lawv puav leej tawm ntawm ib lub hauv paus los. Vim li ntawd, tus ua tau kom luag ntshiab, thiaj tsis txaj muag hu cov txais kev ntshiab ua nws cov kwv.

• Mas Kos Ntawv Moo Zoo (Mc 10, 2-16)

1 Tawm thaj chaw ntawd mus, nws tuaj txog lub xeev ntuj Yus Das, thiab sab pem tus dej Yos Las das sab ped, txawm rov muaj dua tej pab neeg sib sau tuaj mus ntsauv nws raws li niaj zaus thiab nws rov qhuab qhia lawv dua.
2 Ib pab Fas Lis Xais xav sim Yes Xus, lawv txav los nug nws tias : "Tus txiv neej puas muaj cai xa nws poj niam rov qab ?"
3 Yes Xus teb tias : "Mais Xes kom nej ua dab tsi ?"
4 Lawv teb nws tias : "Mais Xes pub kom nws xa nws poj niam yog nws teev muaj daim ntawv sib nrauj."
5 Yes Xus teb tias : “Yog vim nej lub siab dub twm xeeb nws thiaj teev txoj cai li ntawd.
6 Tiam sis, thaum chiv lub keeb tsim teb raug, nws tsim muaj txiv neej thiab poj niam.
7 Yog vim li ntawd, tus txiv neej yuav tso nws niam nws txiv tseg
8 Nws yuav mus npuab nws tus poj niam, nkawd ob leeg yuav los ua ib ke. Nkawd tsis yog ob tug lawm, nkawd yuav ua tib tug xwb.
9 Yog li, yam Tswv Ntuj muab sau los ua ke, kom neeg tsis txhob muab sib cais.”
10 Thaum lawv rov los txog tsev, cov thwj tim nug nws txog qhov ntawd.
11 Nws teb lawv tias : “Tus twg xa nws poj niam kom tau yuav dua lwm tus, nws yog deev hluas ua tub qaug nws poj niam.
12 Yog tus poj niam twg xa nws tus txiv kom tau yuav lwm tus, yog nws deev hluas ua tub qaug nws tus txiv.”
13 Luag coj ib co me nyuam tuaj rau Yes Xus plws lawv, tab sis cov thwj tim muab lawv thawb ntiag rau ib cag.
14 Pom li ntawd, ua Yes Xus npau taws, nws hais lawv tias : "Nej cia cov me nyuam tuaj lawv ntawm kuv. Nej txhob txwv lawv, vim cov neeg tau Tswv Ntuj lub Ceeb Tsheej yog cov zoo li lawv.
15 Kuv qhia ncaj rau nej : leej twg tsis txais Tswv Ntuj lub Ceeb Tsheej zoo li ib tug me nyuam, yuav mus tsis tau rau hauv.
16 Nws puag lawv, nws foom hmoov zoo rau lawv thiab tsa tes plws lawv.

(Mus nyeem tsab ntawv nthuav Ntawv Ntshiab)