COV ZAJ NYEEM RAU HNUB CHIV 03/01/2010
( Huab Tais Yes Xus Tshwm Sim - Xyoo C )


  • Zaj nyeem 1 : Saub His Xais Tsab Ntawv 60,1-6
1 Sawv tsees, Yes Lus Xas Les ! luag ntxhi : koj txoj kev pom kev tuaj txog lawm thiab Tswv Ntuj lub hwj chim sawv tuaj saum koj.
2 Ntsia saib ! ntuj tsaus ntais qhwv tas daim av thiab teb tsaus nti qhwv cov haiv neeg ; tab sis Huab Tais sawv los saum koj thiab nws lub hwj chim ci tuaj saum koj.
3 Tej teb chaws yuav sawv kev tuaj cuag koj txoj kev pom kev thiab tej vaj ntxwv cuag koj kev kaj ntug.
4 Tsa muag ntsia ib ncig ntawm koj : tas sawv daws sib sau tuaj zom zaws ; koj cov tub los deb deb los, koj cov ntxhais lawv puag ntawm npab.
5 Koj yuav pom, koj yuav luag ntxhi, yuav sov koj siab thiab ua koj siab nthuav loj. Thooj nyiaj kub sab dej hiav txwv nraum ub yuav sis laub sis lug tuaj cuag koj nrog cov teb chaws nplua nuj.
6 Tej npoj ntxhuav yuav tuaj koos koj nrog Mas Dias thiab Es Fas cov thauj. Tas cov neeg Ses Npas tuaj, nqa kub thiab xyab ntaw cav lus zoo txog Huab Tais.

  • Zaj nyeem 2 : Cov lus Paj Lug sau tuaj rau cov ntseeg nyob Es Fes Xos 3, 2-3a.5-6
2 Kuv xav tias nej yeej tau hnov piav txog qhov Tswv Ntuj pub txiaj ntsim zoo li cas rau kuv, kom kuv tau kev pab nej.
3 Tswv Ntuj qhib nws cov txuj ci zais tob tob los rau kuv pom xyeem : yog cov lus kuv nyuam qhuav piav me ntsis rau nej ntawd.
5 Ntuj tsis tau qhib cov txuj zais tob no rau txheej laus thaud, xws li nws nyuam qhuav qhib rau nws cov Hauv Paus Xa Lus ntshiab, thiab rau nws cov Yaj Saub, nyob hauv Leej Ntuj Plig :
6 yog qhov tias cov neeg teev pej kum dab txais ib lub cuab tam xws luag, lawv ua tes taw nyob hauv tib lub Cev, lawv txais Ntuj cov lus cog ib yam li luag, nyob hauv Yes Xus Pleev, vim lawv mloog lub Moo Zoo.

  • Mas Tais Ntawv Moo Zoo 2,1-12
1 Yes Xus yug los nyob Npes Les Hes, Yus Das teb, thaum vaj ntxwv Hes Los tseem ua neej nyob. Muaj ib co kws txuj saib hnub qub sab Toob Fab tuaj txog Yes Lus Xas Les.
2 Lawv hais tias : "Cov Yus Das tus vaj ntxwv nyuam qhuav yug los nws nyob qhov twg ? Nyob Toob Fab, peb pom nws lub hnub qub, peb tuaj pe hawm nws."
3 Hnov li ntawd, vaj ntxwv Hes Los lub siab nphau npog nrog Yes Lus Xas Les tas huv si.
4 Nws hu tas cov thawj leej choj thiab cov kws ntawv hauv tsoom pej xeem tuaj sib sau nug lawv kom paub Leej Pleev yug nyob qhov twg.
5 Cov ntawd hais nws li no : "Nyob Npes Les Hes, Yus Das teb, vim saub tau sau tseg tias :
6 Koj thiab, Npes Les Hes, av Yus Das, koj tsis yog tus me khee tw ntawm tas cov zos tseem ceeb hauv Yus das ; vim ib tug thawj coj yuav tawm hauv koj los, nws yuav zov kuv haiv His Xas Lais."
7 Li ntawd, Hes Los hu twj ywm cov kws saib hnub qub tuaj, kom lawv qhia meej rau nws lub caij twg lub hnub qub tshwm tuaj.
8 Thiab nws xa lawv mus Npes Les Hes thiab hais tias : "Nej tau mus lawm, mus tshuaj kom meej txog tus me nyuam ; thaum nej nrhiav tau nws lawm, nej xa xov rau kuv, kom kuv tau mus pe hawm nws thiab."
9 Cov ntawd hnov tus vaj ntxwv hais li, lawv sawv kev mus, saib, lub hnub qub lawv pom sab Toob Fab mus ua lawv ntej mus txog thaum nws nres saum qhov chaw tus me nyuam nyob.
10 Thaum lawv pom lub hnub qub, lawv muaj qhov zoo lawv siab loj kawg.
11 Thaum lawv chaws mus hauv tsev, lawv pom tus me nyuam nrog nws leej niam Mab Liab, lawv lub caug poob nthav pe hawm nws thiab lawv qhib lawv cov paj tshab lawv nqa tuaj rau nws, kub thiab xyab ntaw thiab txab txiv yoov.
12 Ceeb toom hauv lawv zaj npau suav kom txhob rov mus cuag Hes Los, lawv mus dua lwm txoj kev rov fib qab mus lawv teb chaws.



0 commentaires: