COV ZAJ NYEEM RAU HNUB CHIV 09/01/2011
( Chiv Huab Tais txais lub Cim Ntxuav - Xyoo A ) 
 
  • Zaj nyeem 1 : His Xais 42, 1-4.6-7
1 Saib ! Kuv tus tub txib tus kuv nres nroos, tus kuv xaiv tau ntxim siab, kuv pub tag kuv tus pa rau saum nws, nws yuav ua qhov yog tawm rau cov teb chaws,
2 Nws yuav tsis qw, nws yuav tsis nthe, tsis tsa suab nrov txog nraum tej kev.
3 Nws yuav tsis dam tus kaus nqeeb lov, tsis tshuab tus nplaim qauj les kom tuag, qhov yog nws yuav ua kom qhov muaj tseeb tawm tawm.
4 Nws yuav tsis muag ncee, tsis huas kev mus txog thaum nws txuas qhov yog sawv nyob saum daim av thiab nws txoj cai rau cov pov txwv tos ntshis.
5 Huab Tais Tswv Ntuj tus tsim qaum ntuj loj li tom cas thiab daim av dav li tom cas nthaw kaus pub txoj sia rau neeg nyob thiab txoj pa rau cov mus los saum nws.
6 Huab Tais yog kuv, tus hu koj ntawm txoj ke ncaj, kuv tuav rawv koj tes, kuv zov rawv koj, kuv pub rau koj ua chaw cog lus ib haiv neeg ua teeb pom kev rau cov teb chaws,
7 Kom qhib cov dig qhov muag, kom tso tus raug txim tawm tsev loj faj thiab cov neeg nyob hauv qhov tsaus ntuj khiav tawm hauv nkuaj.

  • Zaj nyeem 2 : Hauj Lwm 10,34-38
34 Pob Zeb qhib ncauj hais tias : “Qhov tseeb, kuv pom tias Tswv Ntuj tsis kws leej twg cai,
35 Haiv neeg twg hwm nws thiab coj kev ncaj ncees, yog ua xis nws siab.
36 Lo lus tshaj tuaj rau tsoom tub ki His Xas Lais qhia kev thaj yeeb lub Moo Zoo hauv Yes Xus Pleev, nws yog tas sawv daws tus Huab Tais.
37 Nej li, nej twb paub ntsoov lo lus tshwm sim hauv tas Yus Das teb, pib ntawm Nkas Lis Lais txij Zam tshaj lub cim ntxuav,
38 Li cas Yes Xus Nam Xas Les Tswv Ntuj muab Leej Ntuj Plig Ntshiab pleev nws thiab hwj huam, nws hla tuaj ua qhov zoo thiab kho zoo tag tej neeg raug dab phem, vim Tswv Ntuj nrog nraim nws.”

  • Mas Tais Ntawv Moo Zoo 3, 13-17
13 Yes Xus tawm plaws Nkas Lis Lais rau ntawm Yos Las Das cia rau Zam ua kab ke ntxuav.
14 Zam tsis kam lees hais li no : “Yog kuv, tus yuav cia rau koj ntxuav, koj tseem tuaj cuag kuv.”
15 Yes Xus teb hais rau nws : “Cia li ntawd tam sis no, thiaj haum raws peb ua qhov ncaj ncees.” Ces nws ua twj ywm.
16 Ntxuav plig tas, Yes Xus tawm tam sid hauv dej ; ciav lub ntuj qhib plho, nws pom Tswv Ntuj tus Ntsuj Plig nqes xws li nquab tuaj saum nws,
17 Ciav ib lub suab tuaj saum ntuj hais tias : “Tus no yog kuv Leej Tub tus zoo hlub, hauv nws txaus kuv siab.”

0 commentaires: