COV ZAJ NYEEM HNUB CHIV TIM 06/02/2011
( Chiv 5 Nruab Xyoo - Xyoo A )
 
  • Zaj nyeem 1 : Tsab Ntawv His Xais 58, 7-10
7 Koj puas ntais koj lub ncuav mov rau tus neeg tshaib thiab coj cov pluag tsis muaj chaw cob cuab los tsev ; thaum koj pom tus liab qab koj yuav tau muab qhwv, koj twb tsis lam puam chawj koj cev nqaij.
8 Li ntawd, koj qhov pom kev yuav ua chaw kaj ntug, koj qhov txhab yuav nqawm sai, koj kev ncaj ncees coj koj kev, Huab Tais lub koob meej foob koj lw.
9 Hnub koj hu Huab Tais yuav mloog, koj tsa suab thov nws yuav teb : “Kuv tuaj” ; yog koj tshem tus quab nruab nrab ntawm koj, nkaum koj tes thiab lo tsawm ;
10 Koj pub koj tus plig pab tus neeg tshaib, koj daws tus neeg txom nyem ntsuj plig kev nqhis ; koj qhov pom kev yuav sawv tsees hauv qhov tsaus ntuj li nruab hnub nrig.

  •  Zaj nyeem 2 : Kos Lis Nthos Tsab Ib 2, 1-5
1 Kuv, tus tuaj tim nej, kwv tij, kuv tsis tuaj nrog ib co lus muaj kuab lus  thoob tsib tshaj Tswv Ntuj tej kab xwm puag nruab yeeb rau nej.
2 Tsis muaj dab tsi kuv tos kom nej paub, tsuas kawg Yes Xus Pleev, tus raug luag tua dai ncuv.
3 Kuv ib ce muag nthas txhawj xeeb tshee na thaum kuv tuaj ntawm nej,
4 Kuv tej lus thiab kev tshaj lus tsis muaj ceem yuav ntxias neeg tsis thoob tsib dab tsi, tsuas qhia Leej Ntuj Plig thiab lub hwj huam,
5 Kom xwv nej txoj kev ntseeg txhob txawm hauv tib neeg kev thoob tsib, tiam sis hauv Tswv Ntuj lub hwj huam.

  • Mas Tais Ntawv Moo Zoo 5, 13-16
13 Nej yog ntiaj teb cov ntsev. Thaum ntsev tsuag plig tas, yuav muab dab tsi ua kom qab ntsev tuaj ? Tsis zoo dab tsi kiag, tsuas muab pov tseg sab nraud rau neeg luj taws.
14 Nej yog ntiaj teb qhov pom kev. Ib lub nroog txawm rau saum ncov roob, yuav muab zais tsis tau.
15 Luag tsis taws teeb tas muab khwb hauv pob tawb, tiam sis muab txawb saum tus ncej teeb kom ci rau tas sawv daws hauv tsev.
16 Kuj tib yam, kom nej lub teeb ci ntawm tib neeg xub ntiag, kom xwv lawv pom nej cov dej num zoo thiab lawv cav txog nej Txiv tus nyob saum ntuj.




0 commentaires: