COV ZAJ NYEEM HNUB 08/01/2012
( Huab Tais tawm tuaj    - Xyoo B )
  • Zaj nyeem 1 : Es Xais 60,1-6
1 Sawv tsees, Yes Lus Xas Les ! luag ntxhi : koj txoj kev pom kev tuaj txog lawm thiab Tswv Ntuj lub hwj chim sawv tuaj saum koj.
2 Ntsia saib ! ntuj tsaus ntais qhwv tas daim av thiab teb tsaus nti qhwv cov haiv neeg ; tab sis Huab Tais sawv los saum koj thiab nws lub hwj chim ci tuaj saum koj.
3 Tej teb chaws yuav sawv kev tuaj cuag koj txoj kev pom kev thiab tej vaj ntxwv cuag koj kev kaj ntug.
4 Tsa muag ntsia ib ncig ntawm koj : tas sawv daws sib sau tuaj zom zaws ; koj cov tub los deb deb los, koj cov ntxhais lawv puag ntawm npab.
5 Koj yuav pom, koj yuav luag ntxhi, yuav sov koj siab thiab ua koj siab nthuav loj. Thooj nyiaj kub sab dej hiav txwv nraum ub yuav sis laub sis lug tuaj cuag koj nrog cov teb chaws nplua nuj.
6 Tej npoj ntxhuav yuav tuaj koos koj nrog Mas Dias thiab Es Fas cov thauj. Tas cov neeg Ses Npas tuaj, nqa kub thiab xyab ntaw cav lus zoo txog Huab Tais.
  • Zaj nyeem 2 : Es Fes Xos 3,2-3a.5-6
2 Yog nej twb paub lub koob hmoov Tswv Ntuj lub txiaj ntsim muab pub kuv kom nej tau,
3 Yees qhia kuv paub yam puag nruab yeeb raws li kuv tau sau ob peb los,
5 Nws tsis tau yees qhia rau lwm cov tiam neeg tej tub li tam sis no nws yees qhia nws npoj xa lus ntshiab thiab rau cov saub hauv Ntsuj Plig,
6 Tsoom coj dab qhuas puav leej muaj feem cuab tam, muaj feem xyaw thiab muaj feem nrog kev cog lus hauv Leej Pleev Yes Xus ntawm lub Moo Zoo.

  • Mas Tais Ntawv Moo Zoo 2,1-12
1 Yes Xus yug los nyob Npes Les Hes, Yus Das teb, thaum lub caij Hes Los ua vaj ntxwv, cov txiv muam sab Toob Fab tuaj txog Yes Lus Xas Les,
2 Lawv hais tias : “Cov Yus Das tus vaj ntxwv nyuam qhuav yug los nws nyob qhov twg ? Peb pom nws lub hnub qub sab Toob Fab, peb tuaj pe hawm nws.
3 Hnov li ntawd, vaj ntxwv Hes Los lub siab nphau npog nrog Yes Lus Xas Les tas huv si.
4 Nws hu tas cov thawj leej choj thiab cov kws ntawv hauv tsoom pej xeem tuaj sib sau nug kom paub lub chaw Leej Pleev yug los.
5 Cov ntawd hais rau nws : “Nyob Npes Les Hes, Yus Das teb, vim saub tau sau tseg tias:
6 Koj li, Npes Les Hes, av Yus Das, koj tsis yog tus ua qab hauv Yus Das cov zos tseem ceeb ; vim tus tsav thawj yuav tawm ntawm koj los, nws yuav zov kuv haiv His Xas Lais.”
7 Ces Hes Los txawm hu twj ywm cov txiv muam tuaj, kom lawv qhia meej rau nws lub caij twg lub hnub qub tau tshwm tuaj.
8 Thiab nws xa lawv mus Npes Les Hes nws hais tias : “Nej mus lawm, mus tshuaj kom meej txog tus me nyuam; thaum nej nrhiav tau nws lawm, nej xa xov rau kuv, kom kuv tau mus pe hawm nws thiab.”
9 Tus vaj hais cov lus ntawd tas, lawv txawm sawv kev mus; ua ciav, lub hnub qub lawv pom sab Toob Fab mus ua lawv ntej nres nroos saum qhov chaw tus me nyuam nyob.
10 Thaum lawv pom lub hnub qub, lawv muaj kev zoo siab loj kawg.
11 Thaum lawv chaws mus hauv tsev, lawv pom tus me nyuam nrog nws niam Mab Liab, lawv nyo nris pe hawm nws; lawv qhib lawv cov cuab tam kub thiab xyab thiab txab tshuaj ua paj tshab rau nws.
12 Ceeb toom hauv lawv zaj yog toog kom txhob rov mus cuag Hes Los, lawv mus dua lwm txoj kev rov fib qab mus lawv teb chaws.



0 commentaires: