Lus Paj Huam Tsham Kev Sib Cuag


        Nyob zoo mog     peb ib tsoom hmoob   
      Mus nyob thoob     hauv ntiaj teb no
       Kuv thov nrog     peb sawv daws tham  
     Ncauj lus tsham     tuaj hais nyob zoo
       Mus rau tsoom     niam tsoom txiv 
        Los nrog siv     lub caij nyoog no
       Hais mus txog     rau peb tsoom hmoob 
       Ua neej thoob     puv ntiaj teb no
       Thov los nrog     peb sib tuav teg  
         Sib pab leg     Huab Tais Tswv Ntuj
      Txiv Tswv Ntuj     tes hauj lwm    
      Yeej twb tshwm     rau tib neeg lawm ntxov
     Txhob kiam txog     tias tsi muaj caij  
       Teem lub caij     nyoog yeej tseem tshuav
      Tso lis phluav     koj txoj me kev 
         Txoj qub ke     tseem teev dab qhuag
      Los nrog xyuas     txoj tshiab kev ntseeg 
      Tsuav koj teem     tau lub sij hawm
        Los mus kawm     Tswv Ntuj cov lus  
         Coj tau yus     rau kev thoob tsib
       Thov koj qhib     lub siab rau ntuj 
      Huab Tais Ntuj     tseem niaj hnub tos
         Koj tig los     hloov lub siab tshiab 
Tswv Ntuj txaus siab     pab koj dim phluav
 Nuj nqes koj tshuav     ntawm ntxwj sib nyoog 
 Tsuav koj tig mloog     Tswv Ntuj lus qhia
      Koj thiaj dhia     dhau txoj kev nyuaj 
      Kev puas tsuaj     yuav tsi nphav raug
        Ua neej qaug     rau hauv pem teb  
         Lwj ua nceb     npog nroj ntsuab lawm
  Luag cawm koj tawm     dhau kev ua qhev 
         Txoj me kev     ua neeb ua yaig
 Tseg ncua tsis laig     tsis ua nyuj dab 
   Tsis dov kauj vab     kauj plig npua tai
    Yeej tsis ntshai     vij sub vij sw 
 Duab ntsuj duab xyw     li tseem teev dab
        Vim ntuj pab     hwj haum ncig yeev koj 
         Hwj xwm coj     koj txoj hau kab
      Txawm muaj dab     hem los tsis poob plig 
         Vim koj ris     Huab Tais tus ntoo cuam
         Cog ua vuam     txhos hloov ncej dab 
Muaj txiaj ntsim pab     tiv thaiv roos tau koj
  Nco koob hmoov coj     teev saw Mab Liab  
 Ua neeg nplooj siab     tiv dhau txhua yam
      Kuv tsuas tham     ua lus sib dhos 
      Txawm tsis yog     los thov zam txim
         Coj los lim     tshau peb tsoom hmoob 
      Kom hnov thoob     yog leej twg khaws
       Yeej mus raws     li cov lus no
      Thiaj tau thov     peb sib koom tes
      Muab laim tseg     koj txoj kev txhaum
       Tig mus xyaum     txoj kev cai tshiab
Lam ntxov thawj thiab    tsis nkim dag zog
      Txawm tias yog     koj tsis tau paub
      Huab Tais saub     yog zoo li cas
  Kuv thiaj qhia tag     nco ntsoov lub ntuj
 Huab Tais Tswv Ntuj     tus tsim lub ntuj
 Huab Tais Tswv Ntuj     tus tsim ntiaj teb
        Kom muaj peb     nyob ua ib npoj
       Teev hawm coj     Huab Tais lus qhia
       Nws thiaj cia     nws Leej Tub Yes Xus
        Nqeg los yug      rau hauv ntiaj teb
         Xeeb li peb      ntawm nkauj xwb Mab Liab
     Ntuj tus tshiab      tuaj tshaj xo qhia
       Koj zoo nyiam      koj ua Yes Xus niam
      Koj txawj tiam      coj peb lawv Yes Xus qab
        Mus raws kab      yoog Huab Tais Tswv Ntuj
        Leg tej txuj      cawm ntiaj teb neeg
   Raws tus roj hnee      taug lawv Yes Xus
          Tus los hu      ntiaj teb tib neeg
     Peem yug tsheej      zoo xws li peb
         Tiam si peb      tsis paub Yes Xus
      Qhib ncauj lus      tshaj lub moo zoo
      Ntau tiam xyoo      twb dhau los lawm
       Nco tsis tawm      nws lub xyoo yug
        Muab xam mus      tshaj ob txhiab xyoo
         Lub Moo Zoo      ncha puv ntiaj teb
        Yes Xus tseb      Nws tej lus qhia
       Hla ntau tiam      rau txhia haiv neeg
     Luag twb ntseeg      qos txhiab vam leej
  Tshuav hmoob pheej      tseem tsis tau paub
    Hmoob tseem maub      rau txoj kev tsaus
        Vim tej luas      ib txwm tsis paub
       Ntuj twb laub      txiaj ntsim ntau ntau
         Los pub rau      peb hmoob sawv daws
        Tus tig raws      txoj kev cai tshiab
   Muaj kev kaj siab      rau tas txhua leej
   Ciaj ib haiv neeg      ua neej sib hlub
         Noj sib pub      thiab hau sib cev
          Nyob ua ke      sib koom tuav tes
        Kom sib nres      txawj sib tiam
      Kuv tsuas qhia      li no rau koj
       Yog tshuav lo      tsis nkag koj siab
        Koj ho nyiam      mus ntsib pab neeg
      Yog cov ntseeg      npe Kav Tos Liv
         Lawv li siv      teem koj sij hawm
       Qhia koj kawm      tsis ntshai siv zog
    Yuav pab tau koj      thim dab xas tas
   Zaum caws vos tav      ntiaj teb tib neeg kev
         Kom nej peb      tsis txhob sib hlub
       Dab niaj hnub      haub ntxias tib neeg
      Tsis pub npeeg      nws ib rooj ntxiab
      Nrog xav thiab      kev ua dab qhev
       Los lawm ntev      kav nej tsis lees paub
        Kev cia caub      ntawm ntxwg nyoog
       Yog tig mloog      muaj kev tu siab
    Thaum muaj txiab      thiab diag taub hau
       Yuav tsum sau      poj qaib me npua
         Coj mus tua      hu neeb ua yaig
      Txawm tsi hais      los nej yeej paub
        Kev cia caub      ntawm dab xas tas
       yeej yog tiag      li kuv hais no
        Yog tsis rho      poj qaib niam npua
         Coj mus tua      thaiv thiab theej txhoj
       Ces yuav ploj      thiab yuav raug tuag
       Koj tig xyuas      thiab ntsia kom zoo
       Tos neej nroo      tim ntxwg nyoog phem tshaj
       Niaj hnub daj      thiab niaj hnub deev
Ua koj kho siab seev      cev ntaj duab qaug luj luas
       Ua neeb xyuas      ces txawm pom dab
      Tim pheej thab      thiaj yuav xuas nyuj twm
         Tua pov hwm      rau yawm txiv neeb
       Tias dab txheeb     koj me ntsuj duab
         Yog tsis muab     tsis tau koj ntsuj plig
      Yuav ua cas thim     tseev kom tau dev txaij
    Ntxiv tus npua tai     los tua txi rau
        Muab neej kaus     pov khawv kho mob ntsaj
         Neej tsis kaj     thiab tsis txawj nquas
      Ntaim neej pluag     tas los tsi zoo
         Raug dab khoo     dab tsim koj
          Muab xav zoj     txaus chim siab
        Pes tsawg tiam     raug dab tsim txom
  Thiaj muab ntawv kos     ua lus paj huam
      Hais tuaj tshuam     rau sawv daws paub
        Kom txhob maub     taug txoj kev tsaus
       Thiaj tsis qaug     rau dab quav
     Tsuas kawg tshuav     Huab Tais Yes Xus
            Li yog tus     yuav pab tau koj
         Tig ntiag hlo     thiab tig ntiag lees
        Los mus ntseeg     Huab tais Tswv Ntuj
         Tus muaj txuj     yuav tuav koj tes
         Tus yuav nres     tau koj lub neej
         Kom muaj yeej     nyob kaj siab lug
       Cia tig hlo mus     cuag Huab Tais Ntuj
 Thiaj dim tau dab quj     Leej Txiv Tswv Ntuj tseem tos
        Ua hnub ua hmo     yuas cov me phooj ywg hmoob aw.


Zaj paj huam tas li no xwb. Thov ua tsaug rau koj qee koj lub sij hawm tuaj nyeem zaj paj huam no. Yog tshuav qhov twg tsis nkag siab, thov nej tuaj ntsib peb txhua tus hau Hmongcatholique peb yuav zoo siab qhia nej. Kawg no, thov kom Huab Tais Tswv Ntuj pub nws lub txiaj ntsim tuaj rau nej txhua tus ua tau tuaj nyeem zaj lus no.

29.01.2012       Sau Npe :    Tub Los Tuam Cob Tsib teb  


0 commentaires: