COV ZAJ NYEEM HNUB 03/06/2012
( Hwm Huab Tais 3 Leeg - Xyoo B )
  • Zaj nyeem 1 : Txoj Cai Ob 4, 32-34.39-40
32 Koj nug cov thawj hnub nyoog ua koj ntej, txij hnub Tswv Ntuj tau tsim noob neej saum daim av sab ntuj no txog puag npoo ntuj ub, saib puas muaj tus tsav tsi loj cuag li no, puas tau hnov dua tej yam zoo li no :
33 Puas muaj ib haiv neeg hnov dua Tswv Ntuj lub suab lus nruab nrab hluav taws li koj hnov thiab nws tseem ciaj nyob ?
34 Puas muaj ib tug tswv ntuj twg tuaj coj ib haiv neeg nruab nrab lwm haiv neeg rau nws ua tau hwj huam, cim thiab txuj ci cev tes loj npab ntshuas ntug ntoob los tiv qawv txaus ntshai npaum li nej tus Huab Tais Tswv Ntuj ua rau nej qhov muag ntsia ntsoov nyob Hais Nkws Tos ?
39 Koj paub hnub no, nco ntsoov hauv koj nruab siab tias Huab Tais nws yog Tswv Ntuj saum qaum ntuj thiab saum daim av tsis muaj dua lwm tus.
40 Koj cim ntsoov nws cov lus qhub thiab lus qhia hnub no kuv kom koj mloog kom xwv zoo rau koj thiab tub ki thiab xeeb ntxwv nej siav yuav ntev dhawv saum npoo av koj tus Huab Tais Tswv Ntuj pub rau koj mus ib txhis.

  • Zaj nyeem 2 : Los Mas 8, 14-17
14 Cov neeg Tswv Ntuj Leej Ntsuj Plig coj, lawv yog Tswv Ntuj me nyuam.
15 Vim nej tsis txais tus ntsuj plig qhev tais caus ntxiv, hos nej txais tus Ntsuj Plig cag, muaj nws peb thiaj hais tias : As Npas, Txiv.
16 Tus Ntsuj Plig no lees peb ntsuj plig tias peb yog Tswv Ntuj me nyuam.
17 Twb yog me nyuam kuj yog tseem cag, ciaj cag ntawm Tswv Ntuj vim nrog Leej Pleev ciaj cag, nrog nws txom nyem, peb yuav muaj hwj chim nrog nws thiab.

  • Mas Tais Ntawv Moo Zoo 28, 16-20
16 Pab kaum ib leej thwj tim sawv kev mus rau Nkas Lis Lais saum lub roob ntawm Yes Xus tau teem rau lawv,
17 Pom dheev nws, lawv txhos caug pe, tiam sis cov no tseem ua xyem xyav;
18 Txav zoj los, Yes Xus hais rau lawv tias : “Muab tag huam saum ntuj thiab saum daim av rau kuv.
19 Nej mus ua kom tas zeej tsoom neeg ua kuv thwj tim, ntxuav lawv plig hauv Leej Txiv thiab Leej Tub thiab Leej Ntuj Plig Ntshiab npe,
20 Qhuab qhia lawv hwm tag tej kuv tau kom rau nej ; ntawm kuv, kuv niaj hnub nrog nraim nej mus txog thaum lub caij kawg.”

0 commentaires: