COV ZAJ NYEEM HNUB 20/01/2013
(Nyob nruab xyoo, Chiv 2 - Xyoo C )
  • Zaj nyeem 1 : Es Xais 62,1-5
1 Vim Xis Yoos, kuv yuav tsis nyob ntsiag to, vim Yes Lus Xas Les, kuv yuav tsis tau so, yog nws txoj kev ncaj ncees tsis sawv tsees li kaj ntug thiab nws lub zog yeej tsis cig plaws tuaj li tus nplaim tsau
2 Cov teb chaws yuav pom koj kev ncaj ncees, cov vaj pom koj hwj chim. Luag yuav hu koj dua lub npe tshiab, lub Huab Tais tus kheej tau muab
3 Koj yog lub mom tawg paj paug hauv Huab Tais txhais tes, yog lub mom vaj ntxwv paj zeb hauv koj tus Tswv Ntuj xib teg
4 Luag yuav tsis hu koj ntxiv : “Tus luag xyeej.” Tsis tis koj daim av npe : “Tus luag thuam.” Tiam sis, luag yuav tuav koj npe : “Hauv nws yog kuv chaw dai siab” thiab koj av : “Nkauj nyab”, vim Huab Tais pom koj ua nws chaw dai siab thiab koj av yog nws nkauj nyab
5 Tam zoj tus hluas nraug qaws ib tug nkauj xwb, koj tus tswv yuav qaws koj thiab zoo npaum nkauj nyab ua nraug vauv zoo siab, koj tus Tswv Ntuj yuav zoo siab npaud li rau koj

  • Zaj nyeem 2 : 1 Kos Lis Nthos 12, 4-11
4 Muaj ntau yam txiaj ntsim, tiam sis yog tib tug Ntsuj Plig,
5 Thiab muaj ntau txoj kev tiam, tsuas yog tib tug Huab Tais,
6 Thiab muaj ntau txoj dej num, Tswv Ntuj tib tug tus txhim tas txhua txoj.
7 Leej Ntsuj Plig puav leej pub txhua tus muaj kom tau hauj lwm tag nrho.
8 Leej Ntsuj Plig pub ib lo lus thoob tsib rau ib leeg, lwm tus ib lo lus paub qab hau raws li Leej Ntsuj Plig muab,
9 Lwm leej txoj kev ntseeg, lwm leej ntxiv txiaj ntsim kho tau neeg raws nraim Leej Ntsuj Plig,
10 Rau lwm tus, pub kom ua hwj huam, lwm leej ua saub, lwm tus muaj ntsuj plig soj ntsuam, lwm leej npliag lus thiab lwm tus txawj txhais zaj ;
11 Tib tug Ntsuj Plig ua tej dej num no faib ib yam rau ib leeg raws li nws nyiam.

  • Zam Ntawv Moo Zoo 2, 1-11
1 Hnub peb, muaj ib rooj tshoob nyob Kas Nas xeev Nkas Lis Lais. Yes Xus leej niam nyob ntawd thiab
2 Lawv caw Yes Xus mus noj tshoob nrog nws cov thwj tim
3 Cia li tsis muaj cawv, vim cov cawv tshoob tas lawm. Yes Xus leej niam hais nws tias : “Lawv tsis muaj cawv lawd !”
4 Yes Xus hais nws tias : “Koj thiab kuv muaj tus tsi, poj niam ? Tseem tsis tau txog kuv caij nyoog.”
5 Nws leej niam hais rau cov tub txib : “Nws hais nej dab tsi, ua kiag.”
6 Nyob ntawd, muaj rau lub hub zeb tseg cia cov Yus Das siv yaug cev, ib hub ntim ze li kaum thoob dej
7 Yes Xus hais rau lawv : “Nej hliv dej kom puv cov hub no.” Lawv hliv puv nkaus saum cov ncauj hub
8 Thiab nws hais rau lawv : “Zaum no nej ce thiab nqa mus rau tus txiv thiaj com.” Lawv thiaj nqa mus
9 Thaum txiv thiaj com saj cov dej txia ua cawv no thiab nws tsis paub xyov cov no nyob qhov twg ; hos cov tub txib paub vim lawv tau kwv dej ; txiv thiaj com thiaj hu nraug vauv los
10 Thiab nws hais rau tus ntawd : “Tib neeg sawv daws xub rau cov cawv qab thaum lawv qaug tas mam rau cov qab tsis heev ; hos koj li, koj tseg cov cawv qab cia tav no.”
11 Yog chiv thawj lub ntawm Yes Xus cov cim nyob Kas Nas xeev Nkas Lis Lais thiab ua nws lub hwj chim tshwm plaws, nws cov thwj tim ntseeg nws



0 commentaires: