COV ZAJ NYEEM HNUB 17/02/2013
(Chiv 1 Caij 40 - Xyoo C )
  • Zaj nyeem 1 : Txoj Cai Ob 26, 4-10
4 Thaum koj coj koj phaum qoob tshiab tuaj txog, txiv leej choj txais lub pob tawb ntawm koj tes mus txo ntawm koj tus Huab Tais Tswv Ntuj lub thaj hauv ntej
5 Koj los hais cov lus no ntawm koj tus Huab Tais Tswv Ntuj : “Kuv txiv yog ib tug neeg As Las Mias loj leeb, nws nqes mus Hais Nkws Tos teb ua pej kum neeg, nrog nws pab nyuam txiv tub, nyob nrad, lawv huam vam coob ua ib haiv neeg loj thiab muaj zog
6 Cov Hais Nkws Tos muab peb hiam, txo peb pluag ciaj khaub, yuam peb ua qhev hnyav kawg
7 Peb hu txog Huab Tais, peb cov yawg koob tus Tswv Ntuj. Nws hnov peb lub suab, nws pom peb pluag ciaj khaub, tu siab, raug quab yuam
8 Huab Tais tuaj coj peb tawm Hais Nkws Tos teb ntawm nws tes peev xwm thiab nws caj npab ntug, ua tej lub cim muaj hwj huam txaus ntshai
9 Nws coj peb los rau thaj chaw no thiab pub lub teb chaws no rau peb, yog ib lub teb chaws mis thiab zib ntws sis dug
10 Zim txwv no kuv nqas phaum qoob tshiab ntawm thaj av koj muab pub rau kuv tuaj, Huab Tais
  • Zaj nyeem 2 : Los Mas 10, 8-13
8 Nws hais li cas ? Lo lus ze ntawm koj nyob hauv koj lub ncauj thiab nyob hauv koj siab, yog kev ntseeg lo lus uas peb tshaj
9 Yog koj lub ncauj lees Huab Tais Yes Xus thiab koj ntseeg hauv koj lub siab tias Tswv Ntuj tsa nws sawv lis tsees ntawm tsoom tuag, koj yuav muaj kev cawm
10 Hauv lub siab ntseeg tau ncaj ncees, ntawm lub ncauj lees tau txoj kev cawm
11 Vim ntawv sau tseg : tus neeg ntseeg nws yuav tsis txaj muag
12 Vim tsis muaj qhov sib txawv ntawm tus Yus Das thiab tus Hes Las, nws yog sawv daws tus Huab Tais, tsam peev rau cov hu txog nws
13 Txhua tus leej twg hu Huab Tais lub npe puav leej txais kev cawm
  • Lus Kas Ntawv Moo Zoo 4, 1-13
1 Yes Xus rov ntawm dej Yos Las Das los, muaj Leej Ntuj Plig Ntshiab puv npo nws thiab Leej Ntuj Plig coj nws mus hav suab puam
2 Plaub caug hnub, raug dab phem ntxias, tsis noj dab tsi npaum li hnub, thaum kawg, nws tshaib plab
3 Dab phem hais nws tias : “Ov ! Koj yog Tswv Ntuj Leej Tub, hais kom lub pob zeb no txia ua mov.”
4 Tiam sis Yes Xus teb rau nws : “Muaj lus sau tseg : Tsis yog mov nkaus xwb ua neeg ciaj sia.”
5 Coj tau Yes Xus mus saum lub chaw siab, qhia tas nrho cov vaj ntxwv tej nrim teb saum daim av ib vuag rau nws saib
6 Thiab dab phem hais rau nws : “Kuv yuav muab tej no rau koj kav tag nrho thiab lawv tej hwj chim, vim tej ntawd muab pub kuv tag nrho, kuv xav muab rau leej twg ywj kuv
7 Koj ov, yog koj pe nkaus kuv, tej ntawd tag nrho yog koj tug.”
8 Yes Xus teb rau nws : “Tau sau muaj tseg : Koj yuav pe Huab Tais koj tus Tswv Ntuj thiab koj yuav teev nws ib leeg xwb”
9 Coj dua Yes Xus mus Yes Lus Xas Les, tso nws sawv saum ruv tuam tsev teev ntuj thiab hais rau nws tias : “Ov ! Koj yog Tswv Ntuj Leej Tub, dhia rhees koj tus kheej ntawm no lawm hauv
10 Tau sau muaj tseg tias : Nws yuav txheev nws cov tshaj xo rau koj kom txuag tau koj
11 Thiab lawv yuav nqa koj hauv tes, kom koj taw txhob ntsawm ib lub zeb.”
12 Yes Xus teb rau nws : “Muaj lus sau tseg : Koj tsis txhob ntxias Huab Tais, koj tus Tswv Ntuj.”
13 Kawg tswv yim ntxias tag, dab phem zam kev deb ntawm nws mus txog lwm lub sij hawm





0 commentaires: