COV ZAJ NYEEM HNUB 17/03/2013
(Chiv 5 Caij 40 - Xyoo C )
  • Zaj nyeem 1 : Es Xais 43, 16-21
16 Huab Tais lo lus, tus nws tho ib txog kev hla hiav txwv, ib txog kab plawv dej muaj ceem, tus nws ua kom tsheb thiab nees rag, ua peeb sawv txhawb tub rog lub zog loj.
17 Saib, lawv ntog vau tas sawv tsis taus rov los, qauj thiab kug ua hluav tam zoj quav teeb xeeb. Huab Tais hais li no :
18 “Txhob tshua txog thaum ub lawm, txhob ntshaw yav dhau los, txhob khuv xim.
19 Saib mas ! Kuv ua dua yam tshiab, tus kaus twb nthaw, nej puas paub ? Kuv rhawv ib txoj kev hauv suab puam, ua dej ntws hauv thaj chaw qhuav.
20 Tus tsiaj qus pem toj roob thiab cov plis tom tiaj nras yuav ua kuv tsaug vim kuv ua dej rau hav suab puam thiab niam dej ntws rau thaj chaw qhuav pub kuv haiv neeg kuv xaiv haus.
21 Haiv neeg kuv cob qhia ua kuv tug yuav qhuas kuv lub koob meej.
 
  • Zaj nyeem 2 : Fis Lis Pos 3,8-14
8 Rau kuv txhua yam ploj poob tas vim kev paub Leej Pleev Yes Xus kuv tus Huab Tais tseem ceeb, tim nws kuv thiaj li pluag thiab txhua yam dog dig tsuav kuv tau nkaus Leej Pleev
9 Thiab nrog tau hauv nws txhob ua kuv kev ncaj ncees tuaj ntawm txoj cai hos tuaj ntawm kev ntseeg Leej Pleev tuaj ntawm Tswv Ntuj kev ncaj ncees vim txoj kev ntseeg
10 Kom paub tau nws thiab lub hwj huam nws kev sawv tsees ciaj sia thiab koom nws kev raug txom nyem koom nws kev tuag
11 Saib kuv puas txais tau kev sawv ciaj sia hauv tsoom tub tuag
12 Tsis yog kuv twb txais nkaus lawm los twb txog chaw lawm, hos tseem tab tom taug kev vam tias yuav tau txais tag nrho vim Leej Pleev tau tshoj kuv
13 Kwv tij, kuv tus kheej xav tias kuv tseem txais tsis tau tag nrho, hauv tej yam no, tsis txhob khuv xim yav tag los tsuas xav kom tau lawm tom ntej
14 Kuv mus kom txog chaw kom tau nkaus Tswv Ntuj tus nqe saum ub hauv Leej Pleev Yes Xus
  • Zam Ntawv Moo Zoo 8,1-11
1 Yes Xus mus dua tim roob txiv ntoo roj.
2 Thaum kaj ntug txoog, nws los hauv lub Tuam Tsev Teev Ntuj, tas nrho haiv neeg tuaj cuag nws, zaum chaw, nws thiaj qhuab qhia lawv.
3 Cov thoob xwm thiab cov Fas Lis Xais ntes tau ib tug poj niam deev hluas coj tuaj rau Yes Xus sawv nyob nruab nrab.
4 Lawv hais rau nws : “Xib Hwb, tus poj niam no, ntes tau thaum tseem deev hluas.
5 Nyob hauv peb txoj cai, Mai Xes hais tseg yog muaj li tiag, kom xuas zeb tua. Ntawm koj ne yuav hais li cas ?”
6 Lawv hais li ntawd sim nws kom lawv tau cai liam nws. Tiam sis Yes Xus khoov pem teb muab ntiv tes kos av.
7 Lawv nam zawg zog nug nws, nws tsa hau los hais rau lawv : “Tus tsis muaj txhaum hlo hauv nej kom nws xub cuam zeb rau tus ntawd.”
8 Nws rov qab khoov dua mus kos av.
9 Lawv hnov li ntawd, lawv tawm khiav ib leeg zuj zus cov laus ua ntej, tshuav nws ib leeg kheej thiab tus poj niam tseem sawv nruab nrab.
10 Sawv tsees los, Yes Xus hais rau nws : “Poj niam, lawv dua twg lawm ? Tsis muaj neeg muab koj rau txim ?”
11 Tus no teb tias : “Huab Tais, tsis muaj neeg.” Yes Xus hais nws : “Kuv kuj tsis muab koj rau txim. Kav tsij mus, txij zaum no txhob ua txhaum ntxiv.”


0 commentaires: