Hnub tim 13 lub 3 hlis ntuj 2013,
xaiv tsa tau Vaj Qhia François lawm


Hnub no nyob lub nroog Los Mas (Italy teb), thaum ze ntawm 8 teev tsaus ntuj, tus Tswv Qhia Fab Kis Jean-Louis Tauran tawm ntawm Vas Tis Kas tuam tsev, tuaj tshaj rau tag nrho tsoom ntseeg sawv daws tias "Habemus Papam". Lo lus las tis nas no pes tau tias "Peb tau ib tug Vaj Qhia lawm".

Yog ib lub sij hawm uas 1 200 plhom tus neeg ntseeg Kav Tos Liv thoob ntiaj teb zoo siab heev.
Peb tus Vaj Qhia tshiab saum no yog Tswv Qhia "Jorge Mario Bergoglio" nyob lub nroog "Buenos Aires"  (Argentina teb - As Mes Lis Kas qab teb) tuaj.  

Nws yug hnub tim 17 lub 12 hlis 1936, tau txais lub cim ua Leej Choj xyoo 1969 hauv lub koom txoos "Jésuites".
Hnub tim 21 lub 2 hli 2001, Tswv Qhia Zam Paj Lug II muab nws tsa ua ib tug Tswv Qhia Liab.

Tam sim no, nws muaj 76 xyoo thiab yog tus Vaj Qhia thib 266 los txais Leej Ntshiab Pob Zeb txoj hauj lwm ua tim khawv.

Nws xaiv tau lub npe "François" los ua Vaj Qhia vim tias nws nyiam Leej Ntshiab "St François d'Assise" tus lwj lwm los pab cov neeg me thiab txog nyem.

Cov lus nws tau xub hais rau sawv daws yog :
1- "Cov Tswv Qhia liab tuaj nrhiav kuv nyob puag qab rooj ntuj."
2- "Thawj zaj thov Ntuj, kuv yuav muab rau Tswv Qhia Npes Nes Dis 16 uas tau tso nws lub luag hauj lwm Vaj Qhia tseg."
3- "Ua ntej kuv yuav foom hmoov zoo rau nej, kuv xav kom nej pab thov Ntuj rau kuv thiab."

Nws thiaj li hais zaj "Peb Txiv nyob saum Ntuj" thiab zaj "Koj nyob zoo Niam Mab Liab", nws foom hmoov zoo ua lus Las Tis Nas rau sawv daws.

Lub caij no, pom tau tias kuj yuav mus rau li Yes Xus cov lus nws tau hais rau nws cov thawj tim ua ntej nws yuav nce mus saum ntuj :
"... Leej Ntuj Plig Ntsiab yuab nqes los saum nej, ces nej yuav txais hwj huam, nej yuav ua kuv cov tim khawv nyob Yes Lus Xas Les, nyob thoob lub xeev Yus Das, thiab Xas Mas Lias, mus txog puag tim npoo ntiaj teb". (Ntawv Hauj Lwm 1, 8).

Tam sim no, nyob Europa thiab nyob cov teb caws vam meej, feem coob tsis tshua nco txog Tswv Ntuj lawm. Tab sis nyob qab As Mes Lis Kas, yog lub teb chaw puag tim npoo ntiaj teb uas cov ntseeg Kav Tos Liv coob tshaj.
Vaj Qhia François tau hais tias nws thawj txoj hauj lwm, yuav yog rov pib qhia Huab Tais Yes Xus lub Moo Zoo rau cov nyob Los Mas.


Yaj Xaiv Tsom


0 commentaires: