COV ZAJ NYEEM HNUB TIM 24/11/2013

Chiv 34 Leej Pleev yog lub sim ceeb tus Vaj Ntxwv
  • Zaj nyeem 1 : 2 Xas Muas 5,1-3
1 Tas cov xeem His Xas Lais tib si tuaj cuag Das Vis nyob Hes Nploos, lawv hais tias : “Peb no, kuj koj nqaij thiab koj txha.
2 Nag hmo thiab yav tag los, thaum Xas Ws tseem ciaj vaj ntxwv saum peb, twb yog koj tus coj His Xas Lais mus thiab los. Huab Tais hais rau koj : yog koj tus coj kuv haiv His Xas Lais nog zaub thiab koj los ua tus tsav thawj saum His Xas Lais.”
3 Tag tsoom txwj laus His Xas Lais tuaj cuag tus vaj ntxwv nyob Hes Nploos, tus vaj ntxwv Das Vis hais haum nrog lawv cog lus nyob Hes Nploos ntawm Huab Tais, lawv muab roj pleev Das Vis ua vaj ntxwv saum His Xas Lais.
  • Zaj nyeem 2 : Kos Los Xais 1, 12-20
12 Ua Leej Txiv tsaug tus pub kom nej muaj feem nrog cov ntshiab hauv txoj kev kaj,
13 Yog nws tus nqus peb tawm hauv kev tsaus ntuj lub zog mus rau hauv nws Leej Tub zoo hlub nrim teb,
14 Peb muaj kev txhiv thiab kev zam txhaum hauv nws,
15 Nws yog Tswv Ntuj tus duab zem zuag, tus xub yug hauv txhua yam tsim tshiab,
16 Tim nws thiaj tsim txhua yam saum ntuj thiab saum daim av, yam pom xyeem thiab yam pom tsis tau, cov theej kiab, tej huab tais, cov nrim teb thiab cov muaj hwj chim, tim nws thiab rau nws thiaj tsim tas txhua yam,
17 Yog nws tus xub txawm thiab tas txhua yam tsheeb xeeb hauv nws,
18 Yog nws koom txoos lub cev lub taub hau, yog nws tus chiv keeb, tus xub yug hauv tsoom tub tuag, xwv yog nws tus thawj hauv txhua nrho,
19 Vim hauv nws tas nrho txawm tau nyob txhij txhua,
20 Vim muaj nws coj tas txhua yam los haum xeeb rau nws, vim roj ntsha ntawm nws ntoo cuam pub kev thaj yeeb tas nrho rau cov saum ntuj thiab saum daim av.
  • Lus Kav Ntawv Moo Zoo 23,35-43
35 Tsoom pej xeem sawv ntawd ntsia ntsoov, cov ua thawj thuam tias : Nws twb cawm tau luag tej, kom nws cawm nws tus kheej, nws pom xeeb yog Tswv Ntuj Leej Pleev, tus nws hlub tshaj.
36 Cov tub rog kuj thuam nws, lawv txav los muab dej qaub rau nws.
37 Lawv hais : Koj yog cov Yus Das tus Vaj Ntxwv, rov cawm koj tus kheej !
38 Muaj ob peb npe ntawv dai saum toj saum nws : Tus no cov Yus Das tus Vaj Ntxwv.
39 Ib tug raug txim dai saum ntoo cuam hnyos nws tias : Koj tsis yog Leej Pleev lod ? Rov cawm koj tus kheej thiab wb.
40 Lwm tus thiaj cheem nws thiab tsa suab hais : Koj tsis ntshai tub qaug Tswv Ntuj, koj twb raug txim npaud.
41 Ntawm wb tug, tsuas haum rau wb vim tej wb tau ua, hos nws tsis tau ua dab tsi phem.
42 Thiab nws hais : Yes Xus, nco txog kuv thiab thaum koj yuav kav tuaj.
43 Nws thiaj teb tus no : Kuv hais tseeb rau koj, hnub no, koj yuav nrog kuv nyob hauv ceeb tsheej.

0 commentaires: