Teem caij nyoog nyob hauv xyoo 2017



Hnub tim 11 lub 12 hlis 2016 tas los no, Txiv Vaj Qhia tau tsa 17 tus tim  khawv  los txais lub meej mom Ntshiab nyob rau Los Tsuas teb.

Tom qab ntawd, peb ib tsoom ntseeg Kav Tos Liv nyob Europa yuav npaj 3 lub hmoov tseem ceeb ua Ntuj tsaug rau 17 tus tim khawv ntawd :




  •  Thawj lub caij, muab rau cov Txiv Plig MEP npaj. Yog hnub tim 5 lub 2 hlis ntuj 2017, txij li thaum 11 teev 30 nyob rau lub zos Paris. Tus yuav los tham txog cov tim khawv lub neej, yog Txiv Plig Roland Jacques. Thaum 18 teev tsaus ntuj, sawv daws yuav npaj mus koom thaj txi Ntuj nyob tom lub tuam tsev teev Ntuj loj "Cathédrale Notre Dame de Paris". Tswv Qhia André Vingt-Trois  yog tus yuav los coj lub txoos teev Ntuj.
  • Hnub tim 30 lub 4 hlis 2017: peb cov Hmoob nyob Fab Kis Teb yuav mus koom cov Txiv Plig Is Tas Lis lub hmoov, lawv yuav npaj rau Txiv Plig Txhiaj Tshaj thiab XH Thoj Xyooj, nyob rau lub zos Trente.
  • Hnub tim 3 lub 6 hli 2017 :  tas peb tsoom Hmoob nyob Fab Kis Teb, yuav npaj ib lub hmoov rau XH Thoj Xyooj thiab TP Txhiaj Tshaj, nyob rau lub zos Chatillon-sur-Chalaronne.


Yoj nej leej twg xav tuaj mus koom peb, thov nej sau npe tuaj rau lub hauv paus Aumônerie : aumonerie.hmong.france@gmail.com.


Hauv qab no, yog TP Txhiaj Foom cov lus :

17  TUS NEEG  NTSEEG  TIM  LOS  TSUAS TEB TUAJ YEEM  TUAG :  

Cov phooj ywg  sawv  daws,  nej  kuj nco  tias tim Vees  Cas, hnub 11 lub 12 hlis xyoo 2016, ib cov  neeg ntseeg coob sib sau ua ke hauv tsev teev Ntuj - Ces sawv daws hnov ib tug Tswv Qhia Liab nthuav piav  Vaj Qhia Faas Xuas zaj lus tseem ceeb tias tim Los Tsuas teb, txij ntawm xyoo 1954 rov mus txog xyoo 1970 mas 17 tus neeg ntseeg ( uas tuaj yeem hliv lawv tej ntshav, ua tim khawv txog kev ntseeg ) mas lawv sawv daws kuj yog neeg muaj txoj hmoov  zoo, pem Tswv Ntuj  lub Ceeb Tsheej.

Hauv lawv 17 leej ntawd, thiaj tau muaj 11 tus Txiv Plig thiab 6 tus pej xeem ntseeg . Hos nyob hauv 6 tus neeg ntawd thiaj tau  muaj ib tug kwv tij Hmoob -   Yog peb tus  Xib Hwb, Paj Lug Thoj Xyooj, uas nws hnub nyoog  19 xyoo -    Zoo li tsim nyog peb yuav  nco ntsoov tias : hnub 11 lub 12 hlis, tsaib no, tim lub nroog Vees Cas  thiaj tau muaj ze ntawm 6.000 tus neeg  ntseeg sib koom siab los txog lub tsev teev Ntuj hauv lub nroog Vees Cas – 400 tawm tus neeg tau chaws  nyob hauv tsev teev Ntuj ntawd - Ces 5.000 tawm tus neeg ntseeg nyob nraud  zoov -
Hos  tau muaj  15 tug Tswv Qhia - 21 tus Txiv Plig - thiab 30 tawm  tus Leej Phauj.  Hos Tswv Qhia  Ban  Chong Tho  Pan Hong uas nws nyob pem Luang Prabang,  nws kuj nyob  ntawd ntag.

Hnub ntawd, tus Tswv Qhia Liab (yog neeg  Fis Lis Pees…nws lub npe hu ua Tswv Qhia Kes Ves Dos – Nws sawv  Vaj Qhia Faas Xuas chaws los tshaj ib zaj lus tseem ceeb tshaj plaws   tias : “ Hauv Los Tsuas teb no,17 tus neeg ntseeg uas tuaj yeem tuag ua tim  khawv txog txoj kev ntseeg -  lawv mam li yog neeg muaj txoj hmoov zoo nyob pem Tswv Ntuj lub Ceeb  Tsheej.   Lawv 17 leej  kuj tuaj yeem coj rawv Leej Ntshiab Paj Lug  tib lo lus tias  :  “Kuv nrog Yes  Xus Pleev dai saum Ntoo Cuam – Ua li, tsis yog kuv muaj txoj sia  ntxiv lawm – Qhov tseeb mus li  no : yog  Huab Tais Yes Xus txoj sia ciaj nyob hauv kuv “ ( Nkas Las Tias 2:20 )
Ua li ntawd, peb  yuav cia Huab Tais txeem los hauv peb, los pab peb  tsim  kev thaj yeeb  nyab xeeb, thiab tsim kev ncaj ncees - ces peb yuav tau pab txhawb nqa kev sib haum xeeb hauv teb chaws Los Tsuas no.

Cov kwv  tij, peb tsoom Hmoob  yuav zoo siab  vam txog Xib Hwb  Paj  Lug  Thoj  Xyooj  tuaj pab peb tsoom Hmoob ,  yam peb yuav kub siab ua tim  khawv txog txoj kev ntseeg Ntuj  raws li  Paj Lug Thoj Xyooj  tus  piv txwv .  

HNUB  5  LUB  2  HLIS, tim lub nroog Paris, peb ib cov kwv tij Hmoob thiab ib pab neeg  ntseeg Los Tsuas, thiab ib cov Fab Kis coob kuj yuav sib koom  noj  mov ua ke + sab laj -  Ces  lawv sawv kev mus tom  lub  tuam  tsev  teev Ntuj ( Notre  Dame  de  Paris ) mas mam li  ua Thaj Txi  Ntuj  loj.  Lawv kuj  yuav   nco   ntsoov  txog Tswv Ntuj  tej  txiaj  ntsim tias   :  Tswv  Ntuj  tau  txhawb  zog rau lawv  17 leej ntawd  heev  kawg  nkaus, ces  niaj  hnub no lawv  txoj  hmoov  zoo nyob  pem Ntuj  lub Ceeb Tsheej.

Thov  kom  Tswv  Ntuj  pub Kev Thaj  Yeeb  Nyab  Xeeb  nqes los  puv  nej  sawv  daws tej  siab ntsws.
 
T.P. Txhiaj  Foom,  omi  

PS :  Kuv  mob  ko taws   ces  khuv xim  kawg   nkaus  tias kuv yuav  mus   tsis tau tim PARIS              

29.1.  2017




0 commentaires: